काठमाडौँ-फिफा विश्वकप २०२६ को क्वार्टरफाइनल चरणको सुरुआत आज साविक उपविजेता फ्रान्स र अफ्रिकी शक्ति मोरक्कोबीचको रोमाञ्चक भिडन्तबाट हुँदैछ। नेपाली समयअनुसार खेल राति १:४५ बजे सुरु हुनेछ।
सन् २०२२ विश्वकपको सेमिफाइनलको पुनरावृत्तिका रूपमा हेरिएको यो खेलमा दुवै टोली सेमिफाइनल यात्रा तय गर्ने लक्ष्यसहित मैदान उत्रिनेछन्। यस खेलको विजेता उपाधितर्फ थप एक कदम नजिक पुग्नेछ।
फ्रान्सले अन्तिम १६ मा पाराग्वेलाई १–० ले पराजित गर्दै क्वार्टरफाइनलमा स्थान सुरक्षित गरेको थियो। अपेक्षाअनुसार प्रभावशाली प्रदर्शन गर्न नसके पनि कप्तान किलियन एम्बाप्पेको पेनाल्टीमार्फत भएको एकमात्र गोल टोलीको जितका लागि पर्याप्त बन्यो। प्रतियोगितामा हालसम्म सात गोल गरिसकेका एम्बाप्पे लगातार दोस्रो विश्वकपमा गोल्डेन बुट जित्ने दौडमा अग्रस्थानमा छन्।
फ्रान्सका मुख्य प्रशिक्षक डिडिए डेसचाम्प्सले विजयी टोलीमा धेरै परिवर्तन नगर्ने संकेत दिएका छन्। मिडफिल्डमा मानु कोने र एड्रियन राबियोले जिम्मेवारी सम्हाल्ने सम्भावना रहेको छ भने ओरेलियन चुआमेनी चोटका कारण खेल्ने सम्भावना न्यून रहेको बताइएको छ।
यता, मोरक्कोले अन्तिम १६ मा क्यानडामाथि ३–० को प्रभावशाली जित निकाल्दै अन्तिम आठमा स्थान बनाएको थियो। पहिलो हाफमा दबाब झेलेको टोलीले दोस्रो हाफमा उत्कृष्ट पुनरागमन गर्दै सहज जित हात पारेको थियो। अजेद्दिन ओउनाहीले दुई गोल गर्दा सुफियान रहिमीले एक गोल थपेका थिए।
सन् २०२२ मा पोर्चुगललाई हराउँदै विश्वकपको सेमिफाइनल पुग्ने पहिलो अफ्रिकी राष्ट्र बनेको मोरक्को यसपटक पनि इतिहास दोहोर्याउने लक्ष्यमा छ। त्यसका लागि विश्व वरीयताको शीर्ष टोली फ्रान्सविरुद्ध उत्कृष्ट प्रदर्शन गर्नुपर्ने चुनौती उसअघि रहेको छ।
यद्यपि, मोरक्को केही फिटनेस समस्यासँग जुधिरहेको छ। इस्माइल साइबारी ह्यामस्ट्रिङ चोटका कारण खेल्ने सम्भावना अनिश्चित रहेको छ। उनको अनुपस्थितिमा उत्कृष्ट लयमा रहेका सुफियान रहिमीले सुरुआती रोजाइ पाउने अपेक्षा गरिएको छ। त्यस्तै, चादी रियादको अवस्थासमेत स्पष्ट नभएकाले रेडुआन हलहालले अवसर पाउन सक्ने अनुमान गरिएको छ।
यस खेलको विजेताले सेमिफाइनलमा स्पेन र बेल्जियमबीचको विजेता टोलीसँग प्रतिस्पर्धा गर्नेछ।
