काठमाडौँ — सांसदहरूले मुगुका २५ वर्षीय गणेश नेपालीले आत्मदाहको प्रयास गरेको र पछि निधन भएको घटनाको निष्पक्ष छानबिन गर्न सरकारसँग माग गरेका छन्।
प्रतिनिधिसभाको शुक्रबारको बैठक सुरु हुनासाथ प्रमुख प्रतिपक्षीसहित विपक्षी दलका सांसदहरूले उठेर विरोध जनाएपछि सभामुख डोलप्रसाद अर्यालले सांसद वासना थापालाई बोल्ने समय दिएका थिए।
सांसद थापाले गणेश नेपालीले बिहीबार गरेको आत्मदाह प्रयासबारे सरकार मौन बसेको भन्दै प्रश्न उठाइन्। उनले सामान्य विषयमा नागरिकले यति ठूलो कदम चाल्नुपर्ने अवस्था सिर्जना हुनु दुःखद् भएको बताइन्।
उनले हरियो रङको बसलाई निलो बनाउँदैमा नागरिकको सुरक्षा सुनिश्चित नहुने उल्लेख गर्दै राज्यले जनताको वास्तविक समस्या सम्बोधन गर्नुपर्ने बताइन्। सुकुमवासी तथा विपन्न नागरिकसमेत कठिन परिस्थितिका कारण चरम कदम चाल्न बाध्य हुने अवस्था आएको उनको भनाइ थियो।
सांसद भूमिका लिम्बू सुब्बाले मोटरसाइकल पार्किङ गरेको विषयमा गणेश नेपालीलाई रु १० हजार जरिवाना गरिएको र त्यसपछि उनले आत्मदाहको प्रयास गरेको उल्लेख गर्दै यस्तो परिस्थिति सिर्जना हुनु गम्भीर विषय भएको बताइन्। उनले नागरिकलाई किन बाँच्न कठिन बनाइँदै छ भन्दै सरकारको ध्यानाकर्षण गराइन्।
सांसद पार्वती विकले गणेश नेपालीजस्ता नागरिकले जिउँदै जल्नुपर्ने अवस्था आउनु राज्यका लागि गम्भीर प्रश्न भएको बताउँदै मृतकका परिवारलाई उचित क्षतिपूर्ति उपलब्ध गराउन माग गरिन्। सांसद राधिका रम्तेलले पनि घटनाको सत्यतथ्य छानबिन गर्नुपर्ने धारणा राखिन्।
सांसद ज्ञानबहादुर शाहीले गरिब र विपन्न नागरिकका लागि राजधानीमै जीवनयापन कठिन बन्दै गएको बताए। राज्यका सुविधा र अवसर सीमित वर्गको पक्षमा मात्र केन्द्रित भएको आरोप लगाउँदै उनले जनताले उच्च कर तिरे पनि आधारभूत सेवा र सुरक्षाको अनुभूति गर्न नसकेको बताए।
