काठमाडौँ । संघीय संसद्अन्तर्गत प्रतिनिधि सभा र राष्ट्रिय सभाका चारवटा संसदीय समितिको बैठक सोमबार बस्दै छन्। संसद् सचिवालयले विभिन्न कार्यसूचीसहित सम्बन्धित सदस्य तथा सरोकारवालालाई बैठकमा उपस्थित हुन अनुरोध गरेको छ।
प्रतिनिधि सभाअन्तर्गतको अर्थ समितिको १३औँ बैठक बिहान ८:३० बजे सिंहदरबारस्थित संघीय संसद् सचिवालयको समितिको बैठक कक्षमा बस्नेछ। बैठकमा राष्ट्रिय योजना आयोगसँग आर्थिक वर्ष २०८२/८३ मा सम्पन्न प्रमुख कामकारबाही, १६औँ आवधिक योजनाको कार्यान्वयनको अवस्था, मध्यकालीन खर्च संरचना (एमटिएफ) को कार्यान्वयन तथा राष्ट्रिय प्राथमिकता प्राप्त आयोजना र अन्य विकास आयोजनाको प्रगतिबारे जानकारी लिइने कार्यसूची रहेको छ।
यस्तै, शिक्षा, स्वास्थ्य तथा सूचना प्रविधि समितिको बैठक दिउँसो १:०० बजे बस्नेछ। समितिकी शाखा अधिकृत बिनिता मरासिनी पन्थीका अनुसार बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि छलफल हुनेछ। छलफलका लागि विज्ञान, प्रविधि तथा नवप्रवर्तन मन्त्रालयका मन्त्री र सचिव, कानुन, न्याय तथा संसदीय मामिला मन्त्रालयका सचिव, राष्ट्रिय विधि विज्ञान प्रयोगशालाका कार्यकारी निर्देशक तथा विषयविज्ञ डा. गोपाल कुमार चौधरीलाई आमन्त्रण गरिएको छ।
सोही समयमा कानुन, न्याय तथा मानव अधिकार समितिको आठौँ बैठक पनि सिंहदरबारस्थित समितिको बैठक कक्षमा बस्नेछ। समितिकी शाखा अधिकृत एलिसा श्रेष्ठका अनुसार बैठकमा ‘बाल सुधार गृहमा रहेका बालबालिकाहरूको मानव अधिकारको अवस्थासम्बन्धी निरीक्षण तथा अवलोकन उपसमितिको प्रतिवेदन, २०८३’ माथि छलफल गरिनेछ।
त्यसैगरी, राष्ट्रिय सभाअन्तर्गतको संघीयता सबलीकरण तथा राष्ट्रिय सरोकार समितिको बैठक बिहान ११:३० बजे बस्ने तय भएको छ। बैठकमा मधेस प्रदेशमा गरिएको स्थलगत अनुगमनसम्बन्धी प्रतिवेदनको मस्यौदामाथि छलफल हुने कार्यसूची रहेको संसद् सचिवालयले जनाएको छ।
