चितवन–नारायणगढ–मुग्लिन सडकखण्डका १५ स्थानमा खसेको पहिरो हटाइएपछि यातायात दुईतर्फी रूपमा सञ्चालनमा आएको छ।
सोमबार दिउँसोदेखि परेको अविरल वर्षाका कारण साँझ ७ बजेदेखि सडकका विभिन्न स्थानमा पहिरो खस्न थालेको थियो। रातभर पहिरो खसिरहेकाले सडक अवरुद्ध बनेको थियो। डिभिजन सडक कार्यालय भरतपुरका इन्जिनियर अर्जुन घिमिरेका अनुसार मंगलबार बिहानसम्म सबै स्थानको पहिरो हटाइएपछि सवारी आवागमन पुनः सुचारु गरिएको हो।
सडकमा खसेको पहिरो हटाउन रातिदेखि नै दुईवटा लोडरसहितका उपकरण परिचालन गरिएको थियो।
इन्जिनियर घिमिरेका अनुसार भतेरी, खोरखोला, १५ किलो, ११ किलो, १६ किलो, १९ किलो, सेतीदोभानका दुई स्थान, घुमाउने, सिमलतालका दुई स्थान, २५ किलो, जलविरे, नाम्सी खोला र तुइन खोलामा पहिरो खस्दा सडक अवरुद्ध भएको थियो। तीमध्ये सेतीदोभानमा सडक पूर्ण रूपमा बन्द भएको थियो भने अन्य स्थानमा एकतर्फी रूपमा मात्रै यातायात प्रभावित भएको थियो।
राति १ बजेसम्म अधिकांश स्थानमा सवारी सञ्चालन गर्न सक्ने गरी पहिरो हटाइए पनि केही स्थानमा पुनः पहिरो खस्ने तथा थप पहिरो जाने जोखिम रहेकाले बिहानसम्म सावधानी अपनाइएको थियो।
स्थानीय प्रशासनले वर्षायाममा यस सडकखण्डमा जुनसुकै बेला पहिरो खस्न सक्ने जोखिम रहेकाले विशेषगरी रातिको समयमा सकेसम्म यात्रा नगर्न सर्वसाधारणलाई आग्रह गरेको छ।
