काठमाडौँ । नेकपा (एमाले) सुदूरपश्चिम प्रदेश संसदीय दलले नेपाली काँग्रेस नेतृत्वको प्रदेश सरकारलाई दिएको समर्थन फिर्ता लिने निर्णय गरेको छ।
बुधबार बसेको एमाले संसदीय दलको बैठकले सोही दिन साँझ ५ बजेदेखि लागू हुने गरी सरकारलाई दिएको समर्थन समाप्त गर्ने निर्णय गरेको संसदीय दलका नेता राजेन्द्रसिंह रावलले जानकारी दिएका छन्।
रावलका अनुसार बजेट पुनर्लेखनलगायतका मागहरू सम्बोधन नभएको र ती विषयमा सरकार गम्भीर नभएको भन्दै एमालेका मन्त्रीहरूलाई जिम्मेवारीबाट हटाइएको विरोधस्वरूप समर्थन फिर्ता लिइएको हो।
यसअघि सुदूरपश्चिमका मुख्यमन्त्री कमलबहादुर शाहले एमालेबाट सरकारमा सहभागी मन्त्रीहरूलाई पदमुक्त गरेका थिए। त्यसपछि एमालेले सरकारप्रतिको समर्थन अन्त्य गर्ने निर्णय गरेको हो।
