काठमाडौं । नेपाली कांग्रेसले सातै प्रदेश सरकारमा नेकपा एमालेसँग गरेको सहकार्य अन्त्य गर्ने तयारी गरेको छ।
प्रदेश सरकार सञ्चालनमा एमालेको व्यवहार र भूमिकाप्रति असन्तुष्टि जनाउँदै कांग्रेसले आफ्ना सबै मन्त्रीलाई फिर्ता बोलाउने निर्णयतर्फ अघि बढेको हो।
कांग्रेस स्रोतका अनुसार शीर्ष नेताहरूबीच भएको निरन्तर छलफलबाट एमालेसँगको सहकार्यलाई निरन्तरता दिन नसकिने निष्कर्ष निकालिएको छ। अब प्रदेश सरकारमा सहभागी कांग्रेसका मन्त्रीहरूलाई फिर्ता बोलाउने तयारी गरिएको एक पदाधिकारीले जानकारी दिए।
‘सातवटै प्रदेश सरकारमा रहेका हाम्रा मन्त्रीहरू फिर्ता बोलाउँछौं,’ कांग्रेसका एक पदाधिकारीले भने।
यसअघि बिहीबार मात्रै कर्णाली प्रदेश सरकारमा रहेका कांग्रेसका मन्त्रीहरूले राजीनामा दिएका थिए भने सुदूरपश्चिम प्रदेशमा कांग्रेस नेतृत्वको सरकारले एमालेका मन्त्रीहरूलाई हटाएको थियो।
कर्णालीमा एमाले नेतृत्वको सरकार छ भने सुदूरपश्चिममा कांग्रेस नेतृत्वको सरकार सञ्चालनमा छ। पछिल्ला घटनाक्रमसँगै अन्य प्रदेशमा पनि कांग्रेस–एमालेबीच भएको सहकार्य भंग हुने संकेत देखिएको छ।
कांग्रेस नेताहरूका अनुसार प्रदेश सरकारहरूमा अन्य राजनीतिक दलसँग नयाँ समझदारी बने सरकारमा रहने विकल्पबारे छलफल भइरहेको छ। अन्यथा सबै प्रदेशमा प्रतिपक्षी भूमिकामा बस्ने निष्कर्षमा कांग्रेस पुगेको बताइएको छ।
