काठमाडौँ । ललितपुरको जावलाखेलस्थित सदर चिडियाखानामा बर्डफ्लु सङ्क्रमण पुष्टि भएपछि २७ दिनसम्म सर्वसाधारणका लागि बन्द गर्नुपर्दा करिब रु तीन करोड बराबरको आर्थिक क्षति भएको छ।
राष्ट्रिय प्रकृति संरक्षण कोषले बर्डफ्लु सङ्क्रमण देखिएपछि गत असार ५ गतेदेखि चिडियाखाना बन्द गरेको थियो। आवश्यक नियन्त्रण तथा रोकथामका उपाय पूरा भएपछि साउन १ गतेदेखि पुनः सञ्चालनमा ल्याइएको हो।
चिडियाखानाका सूचना अधिकारी गणेश कोइरालाका अनुसार सङ्क्रमण पुष्टि भएपछि नियमित सरसफाइ, सङ्क्रमित जीवजन्तुको उपचार तथा आवश्यक स्वास्थ्य सुरक्षा मापदण्ड अपनाइएको थियो। त्यसपछि पशु सेवा विभाग, केन्द्रीय पशु रोग अनुसन्धान प्रयोगशाला तथा इपिडिमियोलोजी एवं रोग नियन्त्रण महाशाखाका वरिष्ठ अधिकारीहरूको संयुक्त बैठकले चिडियाखाना पुनः सञ्चालन गर्ने निर्णय गरेको थियो।
कोइरालाका अनुसार सामान्य अवस्थामा दैनिक एक हजार ७०० देखि एक हजार ८०० जनासम्म आगन्तुक चिडियाखाना भ्रमण गर्ने गर्थे। शनिबार पाँच हजारदेखि सात हजार र आइतबार तीन हजार ५०० देखि पाँच हजार जनासम्मको उपस्थिति हुने गरेको थियो। तर पुनः सञ्चालन भएको पहिलो दिन साउन १ गते भने ८०० जना मात्र चिडियाखाना पुगेका थिए।
चिडियाखानाले बालबालिका र ज्येष्ठ नागरिकबाट रु १००, विद्यार्थीबाट रु १५० तथा अन्य आगन्तुकबाट रु २५० प्रवेश शुल्क लिँदै आएको छ।
गत आर्थिक वर्षमा चिडियाखानाले करिब रु १८ करोड आम्दानी गरेको थियो। चालु आर्थिक वर्ष २०८२/८३ मा रु २१ करोड आम्दानी गर्ने लक्ष्य राखिएको भए पनि बर्डफ्लुका कारण लामो समय बन्द रहँदा उक्त लक्ष्य हासिल गर्न चुनौती थपिएको प्रशासनले जनाएको छ।
हाल टिकट काउन्टर बिहान १० बजेदेखि अपराह्न ४ बजेसम्म खुला रहने व्यवस्था गरिएको छ भने सबै आगन्तुकले साँझ ५ बजेसम्म चिडियाखाना परिसर छाड्नुपर्ने व्यवस्था गरिएको छ। सङ्क्रमणअघि भने टिकट काउन्टर साँझ ६ बजेसम्म सञ्चालन हुने गरेको थियो।
