काठमाडौं – उच्च अदालत पाटनले शंकर ग्रुपका अध्यक्ष शंकरलाल अग्रवाललाई बैंकिङ कसुरसम्बन्धी मुद्दामा पुर्पक्षका लागि थुनामा पठाउन आदेश दिएको छ।
बिहीबार न्यायाधीशद्वय अर्जुनप्रसाद कोइराला र कविप्रसाद न्यौपानेको संयुक्त इजलासले अग्रवाललाई थुनामा राखेर मुद्दाको पुर्पक्ष गर्न आदेश दिएको हो।
अग्रवाललाई नेपाल प्रहरीको केन्द्रीय अनुसन्धान ब्युरो (सीआईबी)को टोलीले गत बुधबार काठमाडौं महानगरपालिका–३०, डिल्लीबजारबाट पक्राउ गरेको थियो। उनी नेपाल राष्ट्र बैंकको जाहेरीका आधारमा दर्ता भएको दीपक भट्टसमेत संलग्न बैंकिङ कसुर तथा सजाय ऐन, २०६४ अन्तर्गतको विचाराधीन मुद्दामा फरार रहेका थिए।
यसअघि पनि सीआईबीले उनलाई गत चैत २० गते सम्पत्ति शुद्धीकरणसम्बन्धी कसुरमा पक्राउ गरेको थियो। उक्त प्रकरणमा सम्पत्ति शुद्धीकरण अनुसन्धान विभागले अनुसन्धान गरेको थियो। पक्राउपछि उनलाई जिल्ला प्रहरी कार्यालय ललितपुरमा राखिएको भए पनि चैत २२ गते रिहा गरिएको थियो।
यता, अग्रवालका छोरा सुलभ अग्रवाल भने हाल पनि थुनामै रहेका छन्।
