काठमाडौँ । राष्ट्रिय स्वतन्त्र पार्टी (रास्वपा) ले आफ्ना संघीय सांसदका स्वकीय सचिव नियुक्ति तथा व्यवस्थापनलाई पारदर्शी, मितव्ययी र जनउत्तरदायी बनाउन आन्तरिक निर्देशन जारी गरेको छ।
पार्टीका महामन्त्री विपिन कुमार आचार्यद्वारा जारी निर्देशनअनुसार स्वकीय सचिव नियुक्तिमा नातावाद र परिवारवादलाई पूर्ण रूपमा निषेध गरिएको छ। एकाघरका सदस्य वा नजिकका नातेदारलाई स्वकीय सचिव नियुक्त गर्न नपाइने व्यवस्था गरिएको छ।
निर्देशनमा उम्मेदवारले कम्तीमा स्नातक तह वा सोसरह शैक्षिक योग्यता हासिल गरेको हुनुपर्ने, अनुसन्धान क्षमता, प्रविधिमैत्री सीप तथा पार्टीका मूल्य–मान्यताप्रति प्रतिबद्ध व्यक्तिलाई प्राथमिकता दिइने उल्लेख छ। योग्यता पुगेका महिला, सीमान्तकृत समुदाय र पछाडि पारिएका वर्गका उम्मेदवारलाई पनि प्राथमिकता दिने व्यवस्था गरिएको छ।
त्यस्तै, स्वकीय सचिवको छनोट सार्वजनिक आह्वान वा खुला प्रतिस्पर्धामार्फत गर्नुपर्ने तथा अन्तिम नियुक्तिअघि रास्वपा संसदीय दलको स्वीकृति अनिवार्य हुने व्यवस्था गरिएको छ। नियुक्तिसम्बन्धी विवाद वा उजुरीको अन्तिम निर्णय गर्ने अधिकार पार्टीमै रहने जनाइएको छ।
