काठमाडौं । सुनसरीको देवानगञ्जमा दुई समुदायबीच भएको झडप तथा त्यसक्रममा प्रहरीले गोली चलाउँदा एक जनाको मृत्यु भएको घटनाबारे राष्ट्रिय मानव अधिकार आयोगले अनुसन्धान सुरु गरेको छ।
आयोगका प्रवक्ता डा. टीकाराम पोखरेलले सोमबार विज्ञप्ति जारी गर्दै आयोगको कोशी प्रदेश कार्यालय, विराटनगरको टोलीले घटनास्थलमा प्रारम्भिक अनुगमन गरिरहेको जानकारी दिएका छन्।
आयोगका अनुसार प्रमुख जिल्ला अधिकारी, जिल्ला प्रहरी प्रमुख, अस्पताल प्रशासन तथा स्थानीयवासीसँग घटनाबारे जानकारी संकलन भइरहेको छ।
प्रारम्भिक अनुगमनका क्रममा पोलमा झण्डा राख्ने विषयलाई लिएर दुई समुदायबीच विवाद सुरु भएको, डिजे बजाउने विषयमा विवाद चर्किएपछि तोडफोड र झडप भएको तथा स्थिति नियन्त्रणमा लिन प्रहरीले गोली चलाएको खुलेको आयोगले जनाएको छ।
प्रहरीको गोली लागेर ओमप्रकाश मेहताको मृत्यु भएको छ भने ९ जना घाइते भएका छन्। घाइतेमध्ये दुई जनाको अवस्था गम्भीर रहेको आयोगले उल्लेख गरेको छ।
घाइतेमध्ये चार जनाको न्युरो अस्पताल, चार जनाको विराट नर्सिङ होम र एक जनाको नोबेल मेडिकल कलेजमा उपचार भइरहेको जानकारी आयोगले प्राप्त गरेको जनाएको छ।
घटनापछि विरोध प्रदर्शनका क्रममा विभिन्न स्थानमा टायर बालिएको, आन्दोलनकारीहरूले लाठी, रडलगायत सामग्रीसहित प्रदर्शन गरेको तथा कप्तानगञ्जसहितका क्षेत्रमा अवस्था तनावपूर्ण बनेको आयोगले जनाएको छ। सुरक्षा अवस्था नियन्त्रणमा लिन नेपाली सेना परिचालन गरिएको जानकारी पनि आयोगले दिएको छ।
आयोगले घटनाको निष्पक्ष अनुसन्धान गरी दोषीलाई कानुनी कारबाहीको दायरामा ल्याउन, मृतकका परिवारलाई राहत तथा क्षतिपूर्ति उपलब्ध गराउन र घाइतेहरूको निःशुल्क तथा प्रभावकारी उपचारको व्यवस्था गर्न सरकारलाई निर्देशन दिएको छ।
साथै आयोगले राजनीतिक दल, नागरिक समाज, मानव अधिकारकर्मी तथा सर्वसाधारणलाई वार्ता र संवादमार्फत विवाद समाधान गरी सामाजिक सद्भाव कायम राख्न सहयोग गर्न आग्रह गरेको छ।
