काठमाडौं । सरकारले सुनसरीको देवानगञ्ज गाउँपालिका–३ कप्तानगञ्जमा भएको घटनापछि विकसित परिस्थितिप्रति गम्भीर ध्यानाकर्षण जनाएको छ। प्रधानमन्त्री तथा मन्त्रिपरिषद् कार्यालयले मंगलबार विज्ञप्ति जारी गर्दै सबै पक्षलाई संयमता अपनाउन र सामाजिक सद्भाव कायम राख्न आग्रह गरेको हो।
प्रधानमन्त्री कार्यालयका सहसचिव एवं प्रवक्ता हेमराज अर्यालद्वारा जारी विज्ञप्तिमा घटनामा घाइते भएकाहरूको निःशुल्क उपचारको व्यवस्था स्वास्थ्य तथा खाद्य स्वच्छता मन्त्रालयमार्फत गरिने उल्लेख गरिएको छ।
घटनाको सत्यतथ्य छानबिन गर्न गृह मन्त्रालयले समिति गठन गरिसकेको र समितिले काम सुरु गरिसकेको पनि विज्ञप्तिमा जनाइएको छ। सात दिनभित्र प्रतिवेदन पेस गर्ने जिम्मेवारी दिइएको उक्त समितिले यस्ता घटना दोहोरिन नदिन आवश्यक उपायसमेत सिफारिस गर्नेछ।
सरकारले पीडितलाई उचित क्षतिपूर्ति उपलब्ध गराउने र घटनामा संलग्न दोषीमाथि कडा कानुनी कारबाही गर्ने प्रतिबद्धता दोहोर्याएको छ।
‘कुनै पनि समस्या, असन्तुष्टि वा विवादको समाधान हिंसा वा मुठभेडबाट सम्भव हुँदैन भन्नेमा नेपाल सरकार पूर्ण रूपमा विश्वास गर्दछ,’ विज्ञप्तिमा उल्लेख छ।
सरकारले धार्मिक तथा साम्प्रदायिक सद्भाव बिथोल्ने कुनै पनि गतिविधिमा संलग्न नहुन, उत्तेजक अभिव्यक्ति वा भ्रामक सूचना नफैलाउन र त्यस्ता सूचनाबाट प्रभावित नभई संयमता अपनाउन सबैमा आग्रह गरेको छ।
विज्ञप्तिमा भनिएको छ, ‘नेपाली समाजले सदियौँदेखि अवलम्बन गर्दै आएको धार्मिक सहिष्णुता, आपसी एकता र सामाजिक सद्भावलाई कायम राख्दै त्यसमा खलल पुर्याउने गतिविधिबाट टाढा रहन तथा अफवाह र भ्रामक सूचनाको पछि नलाग्न नेपाल सरकार सबै सम्बद्ध पक्षसँग हार्दिक अपिल गर्दछ।’
