काठमाडौँ – राष्ट्रपति रामचन्द्र पौडेल र राष्ट्रिय स्वतन्त्र पार्टी (रास्वपा)का सभापति रवि लामिछानेबीच बुधबार राष्ट्रपति भवन शीतल निवासमा भेटवार्ता भएको छ।
भेटका क्रममा सभापति लामिछानेले मुलुकको समसामयिक राजनीतिक अवस्था तथा सुनसरीमा हालै भएको घटनापछिको परिस्थितिबारे राष्ट्रपति पौडेललाई जानकारी गराएका छन्। उनले उक्त घटनापछि सामाजिक सद्भाव कायम राख्ने, तनाव न्यूनीकरण गर्ने तथा राजनीतिक दलहरूबीच भएको समन्वय र छलफलबारे पनि राष्ट्रपतिलाई ब्रिफिङ गरेका थिए।
राष्ट्रपति पौडेलको सचिवालयका अनुसार सुनसरी घटनालाई केन्द्रमा राखेर आयोजित सर्वदलीय बैठकमा भएका छलफल, दलहरूको साझा धारणा र सामाजिक सद्भाव कायम राख्न चालिएका पहलका विषयमा पनि लामिछानेले राष्ट्रपतिलाई अवगत गराएका हुन्।
भेटका क्रममा राष्ट्रपति पौडेलले मुलुकमा शान्ति, सुरक्षा र सामाजिक सद्भाव कायम राख्न राजनीतिक दलहरूको भूमिका महत्वपूर्ण हुने बताएका थिए। साथै, पछिल्लो राजनीतिक घटनाक्रम र संसदको प्रभावकारिता सम्बन्धी विषयमा समेत दुवै नेताबीच सामान्य छलफल भएको सचिवालयले जनाएको छ।
