काठमाडौं– नेकपा एमालेले सुनसरी घटनाको नैतिक जिम्मेवारी लिँदै प्रधानमन्त्री बालेन्द्र शाह र गृहमन्त्री सुधन गुरुङले राजीनामा दिनुपर्ने माग गरेको छ।
बिहीबार प्रतिनिधिसभाको बैठकमा बोल्दै एमाले सांसद पद्मा अर्यालले सुनसरीमा भएको घटनाको जिम्मेवारी सरकारले लिनुपर्ने भन्दै प्रधानमन्त्री र गृहमन्त्रीले पदबाट हट्नुपर्ने बताइन्।
उनले भनिन्, ‘काठमाडौंमा गोली चल्दा र मान्छे मर्दा तत्कालीन प्रधानमन्त्री र गृहमन्त्रीले थुनामा बस्नुपर्छ, राजीनामा दिनुपर्छ भन्नेहरू अहिले सुनसरीमा गोली चल्दा प्रधानमन्त्री र गृहमन्त्रीले पनि राजीनामा दिनुपर्छ, थुनामा बस्नुपर्छ भन्ने मान्यता राख्छन् कि राख्दैनन् ?’
अर्यालले विगतमा अरूमाथि फौजदारी कसुर लगाउनेहरू अहिले सुनसरी घटनाको नैतिक जिम्मेवारी लिन तयार छन् कि छैनन् भन्ने प्रश्नसमेत उठाइन्।
देशमा तनावपूर्ण अवस्था सिर्जना भइरहँदा प्रधानमन्त्री जनतामाझ नदेखिएको आरोप लगाउँदै उनले नेतृत्व संकटको समयमा जिम्मेवार ढंगले प्रस्तुत हुनुपर्ने बताइन्।
‘जनतालाई दुःख पर्दा नेतृत्व अग्रपङ्क्तिमा देखिनुपर्छ। जनताको सुरक्षाका लागि सरकार दृढताका साथ उभिनुपर्छ। मुलुकको सुरक्षा र स्थिरताका लागि सरकारले जिम्मेवार भूमिका खेलेमा हाम्रो साथ र सहयोग रहनेछ,’ उनले भनिन्।
