विराटनगर । सुनसरीको देवानगञ्ज–कप्तानगञ्ज घटनामा संलग्नमाथि कारबाहीको माग गर्दै जिल्ला प्रशासन कार्यालय मोरङअगाडि प्रदर्शन गरिएको छ।
प्रदर्शनकारीहरू मेनरोडस्थित हनुमान मन्दिर क्षेत्रबाट नाराबाजी गर्दै ज्ञापनपत्र बुझाउन प्रशासन कार्यालय पुगेका थिए। उनीहरू कार्यालयको मुख्य गेटमा पुगेपछि सुरक्षाकर्मीले ब्यारिकेड खडा गरी प्रवेश रोकेका छन्। सम्भावित अप्रिय अवस्था रोक्न प्रशासन कार्यालय परिसरमा सुरक्षा व्यवस्था पनि कडा पारिएको छ।
देवानगञ्ज घटनामा प्रहरीको गोली लागेर एक युवकको मृत्यु भएको थियो भने गोली लागेर घाइते भएका अन्य केही व्यक्तिको विराटनगरस्थित विभिन्न अस्पतालमा उपचार भइरहेको छ।
दुई समुदायबीच भएको झडप नियन्त्रणमा लिन सशस्त्र प्रहरीले गोली चलाएको थियो। घटनापछि सुनसरीका विभिन्न स्थानमा प्रदर्शन, तोडफोड तथा आगजनीका घटना भएका छन्।
यता, साम्प्रदायिक तनावपछि जिल्ला प्रशासन कार्यालय सुनसरीले देवानगञ्ज–कप्तानगञ्जसहित प्रभावित क्षेत्रमा जारी गरेको कर्फ्यु बिहीबार पनि यथावत् राखेको छ। प्रशासनले साउन १२ गते राति ९ बजेदेखि अर्को सूचना जारी नभएसम्मका लागि कर्फ्यु आदेश लागू गरेको थियो, जुन अझै कायम छ। कर्फ्युका कारण प्रभावित क्षेत्रमा जनजीवन प्रभावित बने पनि जिल्लाका अन्य स्थानमा अवस्था सामान्य रहेको जनाइएको छ।
