काठमाडौं । काठमाडौंको बानेश्वर वितरण केन्द्रअन्तर्गत पर्ने विभिन्न क्षेत्रमा आज (शनिबार) केही समयका लागि विद्युत् आपूर्ति अवरुद्ध हुने भएको छ।
नेपाल विद्युत् प्राधिकरणले सूचना जारी गर्दै बत्तिसपुतली र बानेश्वर फिडरअन्तर्गतका विभिन्न स्थानमा मर्मत तथा प्राविधिक कार्यका कारण विद्युत् सेवा अस्थायी रूपमा बन्द गरिने जनाएको हो।
प्राधिकरणका अनुसार नयाँ बानेश्वरस्थित इम्पलेक्स मलअगाडि लोड ब्रेक स्विच जडान, पुरानो बानेश्वरमा बत्तिसपुतली र बानेश्वर फिडरबीच इन्टरलिङ्किङ स्विच जडान तथा बस कटिङलगायतका प्राविधिक काम गर्न फिडरहरू शटडाउन गर्न लागिएको हो।
सूचनाअनुसार, बिहान ११:०० बजेदेखि दिउँसो २:०० बजेसम्म बत्तिसपुतली फिडरअन्तर्गत पर्ने नयाँ बानेश्वर, मध्य बानेश्वर, पुरानो बानेश्वर, बत्तिसपुतली र छक्कुबकु मार्ग क्षेत्रमा विद्युत् आपूर्ति बन्द रहनेछ।
सोही अवधिमा बानेश्वर फिडरअन्तर्गत पर्ने ठुलो खरिबोट, कात्यायनी चोक, मिलन चोक, पुरानो बानेश्वर र मध्य बानेश्वर क्षेत्रमा पनि विद्युत् सेवा अवरुद्ध हुनेछ।
त्यसैगरी, दिउँसो ३:०० बजेदेखि साँझ ४:३० बजेसम्म बत्तिसपुतली फिडरअन्तर्गत पर्ने नागस्थान, कुमारी मन्दिर, सूर्य विक्रम ज्ञवाली मार्ग, साहित्य मार्ग तथा मुस्कान मासु पसल आसपासका क्षेत्रमा पनि विद्युत् आपूर्ति बन्द रहने नेपाल विद्युत् प्राधिकरणले जनाएको छ।
