आफ्नो कार्यशैलीलाई लिएर सदन र सडकबाट आलोचना बढ्न थालेपछि प्रधानमन्त्री वालेन्द्र शाहले सामाजिक सञ्जालबाटै जवाफ फर्काएका छन् । शुक्रवार मध्यराति सामाजिक सञ्जाल फेसबुकमा स्टाटस लेख्दै प्रधानमन्त्री शाहले कहिलेकाहीँ सुनेको र देखेकोभन्दा वास्तविकता फरक हुने जिकिर गरेका हुन् ।
सही समय आउनका लागि केही समय लाग्ने उल्लेख गरेका प्रधानमन्त्री शाहले ढिलाइ भएपनि गलत नहुने आश्वासन पनि दिएका छन् । कसैलाई स्पष्ट इङ्गित नगरेपनि प्रधानमन्त्री शाहले नआत्तिन आग्रह समेत गरेका छन् । प्रधानमन्त्रीको पछिल्लो अभिव्यक्ति विपक्षी सांसद र आफ्नै दलका सांसदतर्फ केन्द्रित भएको बुझिएको छ ।
शाह नेतृत्वको सरकारको काम गर्ने ढंग ठीक नभएको भन्दै शुक्रबारको प्रतिनिधिसभा बैठकमा रास्वपा का सांसदहरूले नै आलोचना गरेका थिए । रास्वपाका सांसद मनिष झाले वर्तमान सरकारको नियत गलत नभएपनि ढंग नपुगेको टीप्पणी गरेका थिए ।
सांसद झा बाहेकका रास्वपाकै अन्य सांसदहरुले पनि सरकारको कार्यशैलीप्रति संसद बैठकमा सांकेतिक विरोध गर्न थालेका छन् । विपक्षी सहित आफ्नै दलका सांसदहरु नै विपक्षमा उत्रन थालेपछि प्रधानमन्त्री शाहले लेखेका छन्–‘कहिलेकाहीँ एक्लै लड्नुपर्छ, यो पहिलोचोटि होइन’ ।
