काठमाडौं । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा झन्डै छ महिनापछि आज स्वदेश फर्किंदैछन् । उनी बिहीबार मध्याह्न साढे १२ बजे थाई एयरको उडानमार्फत काठमाडौं आइपुग्ने कांग्रेस नेता डा. प्रकाशशरण महतले जानकारी दिएका छन् ।
देउवाको स्वागतका लागि कांग्रेसको संस्थापनइतर समूहले त्रिभुवन अन्तर्राष्ट्रिय विमानस्थलमा बाजागाजा र सांस्कृतिक झाँकीसहितको कार्यक्रम आयोजना गर्ने तयारी गरेको छ । राष्ट्रिय भेलाका लागि गठन गरिएको सांस्कृतिक समितिकी संयोजक विद्या तिमिल्सिनाका अनुसार देउवालाई स्वागत गर्न सांस्कृतिक झाँकीसहित बाजागाजा प्रस्तुत गरिनेछ ।
जेनजी आन्दोलनका क्रममा भएको सांघातिक आक्रमणमा परी घाइते भएका देउवा गत १३ फागुनको राति सिंगापुर एयरलाइन्सको उडानबाट उपचारका लागि सिंगापुर गएका थिए । त्यसपछि थप उपचारका लागि उनी ७ चैत २०८२ मा सिंगापुरबाट हङकङ पुगेका थिए ।
स्वदेश फर्किएलगत्तै देउवा शुक्रबार सुकेधारास्थित मिराकल पार्टी प्यालेसमा आयोजना हुने कांग्रेसको संस्थापनइतर समूहको राष्ट्रिय भेलामा सहभागी हुनेछन् । प्रचार–प्रसार समितिका संयोजक मीन विश्वकर्माका अनुसार भेलाको उद्घाटन समारोह शुक्रबार दिउँसो १ बजे सुरु हुनेछ ।
तीन दिनसम्म सञ्चालन हुने राष्ट्रिय भेलामा करिब पाँच हजार नेता–कार्यकर्ता सहभागी हुने अपेक्षा संस्थापनइतर समूहले गरेको छ ।
