जनकपुरधाम । रसुवाको भोटेकोशी नदीमा आएको बाढीपछि श्रीमान् सम्पर्कविहीन भएको दुई सातासम्म पनि अवस्था अज्ञात रहेपछि जनकपुरधामकी पूजा साहको चिन्ता र छटपटी बढ्दै गएको छ ।
रसुवास्थित युटी २१६ मेगावाट डूसन पावर हाउसमा कार्यरत इन्जिनियर अजयप्रसाद सिंह भदौ १० गते भोटेकोशीमा आएको बाढीपछि सम्पर्कविहीन हुनुभएको हो । उहाँको अवस्था अझै पत्ता लाग्न नसकेपछि परिवारले खोज तथा उद्धारलाई तीव्र बनाउन सरकार तथा सम्बन्धित निकायसँग आग्रह गरेको छ ।
श्रीमान् सकुशल रहेको विश्वासमा रहनुभएकी पूजाले सामाजिक सञ्जालमार्फत भावुक अपिल गर्नुभएको छ । “तिमी जहाँ छौँ, जस्तो छौँ, मलाई खबर गर, म आफैँ आउँछु, तिमीलाई लिन । बस्, एकपटक तिम्रो आवाज सुन्न र तिमीलाई देख्न पाऊँ,” उहाँले लेख्नुभएको छ ।
पूजाका अनुसार सानी छोरीसमेत बाबाको भिडियो कल र आवाजको प्रतीक्षामा छिन् । “हाम्रो नानी अझै बाबाको भिडियो कलको प्रतीक्षामा छिन् । बाबाको आवाज सुन्न र अनुहार हेर्न पाएकी छैनन्,” उहाँले भन्नुभएको छ ।
उहाँले श्रीमान् जहाँ भए पनि सकुशल घर फर्काइदिन सरकार, सुरक्षा निकाय, स्थानीय तह तथा सम्बन्धित सबै पक्षसँग आग्रह गर्नुभएको छ । “मैले अब केही मागेकी छैन, बस् मेरो श्रीमान् जहाँ हुनुहुन्छ, त्यहीँबाट सकुशल घर फर्काइदिनुहोस्,” उहाँको अपिल छ ।
सिंहको खोजीका लागि परिवारले सम्बन्धित कम्पनी, जिल्ला प्रशासन, सुरक्षा निकाय, स्थानीय तह र विपद् व्यवस्थापन निकायको ध्यानाकर्षण गराउँदै तत्काल प्रभावकारी खोजी अभियान सञ्चालन गर्न माग गरेको छ ।
पूजाले मैलुङ बजार, क्याम्प आसपास, ठाडेगाउँ, राम्चे, ग्राङ, बटार, कालिकास्थान, धुन्चे, भोर्ले, यार्सा, मैलुङडाँडा तथा आसपासका सम्भावित क्षेत्रमा खोजी गर्न आग्रह गर्नुभएको छ । जङ्गल, पहाडी तथा अन्य सम्भावित स्थानमा ड्रोन र उद्धार टोली परिचालन गर्नुपर्ने उहाँको माग छ ।
उहाँका अनुसार सम्पर्कविहीन भएकाहरूको खोजीका लागि टोली पठाउने आश्वासन पाए पनि प्रभावकारी रूपमा खोजी हुन नसकेको परिवारको गुनासो छ । बिहान ड्रोनसहितको उद्धार टोली घटनास्थलतर्फ जाने भनिए पनि दिउँसोसम्म टोली नपुगेको उहाँले बताउनुभयो ।
“हामी तपाईंहरूको कार्यालय धाउँदै–धाउँदै, अनुरोध गर्दागर्दै थाकिसकेका छौँ । अब के गर्ने ?” पूजाले प्रश्न गर्नुभएको छ ।
उहाँले सिंहको मात्र नभई मैलुङ क्षेत्रमा सम्पर्कविहीन तथा अलपत्र परेका सबै नागरिकको खोज तथा उद्धारलाई प्राथमिकतामा राख्न माग गर्नुभएको छ । “अब आश्वासन होइन, तत्काल उद्धार चाहिएको छ । हाम्रा मानिसहरूलाई खोजिदिनुहोस्, उद्धार गरिदिनुहोस्,” उहाँले भन्नुभएको छ ।
यसैबीच, भोटेकोशी बाढीमा हराइरहेका मधेस प्रदेशका २२० जनामध्ये ३८ जना परिवारको सम्पर्कमा आएका छन् । मधेस प्रदेश प्रहरी कार्यालय जनकपुरधामका प्रवक्ता वरिष्ठ प्रहरी उपरीक्षक प्रभुप्रसाद ढकालका अनुसार सप्तरी र बाराका एक–एक जना गरी दुई जनाको शव फेला परेको छ भने १८० जना अझै सम्पर्कविहीन छन् ।
बाढीपछि आफन्तको अवस्था अज्ञात रहँदा सिंहको परिवारसहित अन्य परिवार पनि निरन्तर चिन्तामा छन् । पीडित परिवारले सम्भावित सबै क्षेत्रमा समन्वय गरी खोज तथा उद्धार अभियान तीव्र बनाउन सरकार र सम्बन्धित निकायसँग आग्रह गरेका छन् ।
रासस
