भद्रपुर (झापा) । झापामा जापानिज इन्सेफ्लाइटिस (जेई) विरुद्ध पाँच लाखभन्दा बढी नागरिकलाई खोप लगाइने भएको छ ।
स्वास्थ्य कार्यालय झापाले आगामी असोज ५ देखि १५ गतेसम्म जिल्लाका १५ वटै स्थानीय तहमा ३० वर्षमाथिका नागरिकलाई लक्षित गरी खोप अभियान सञ्चालन गर्ने जनाएको छ ।
कार्यालय प्रमुख बृजकुमार दासका अनुसार अभियानका लागि आवश्यक खोप जिल्लामा आइसकेको छ । स्थानीय तहसँग समन्वय, स्वास्थ्यकर्मीको अभिमुखीकरण तथा खोप केन्द्र व्यवस्थापनलगायतका तयारीसमेत पूरा भएको उनले बताए ।
जेई सङ्क्रमण र यसबाट हुने मृत्युदर बढ्दै गएपछि उच्च सतर्कतासहित अभियान सञ्चालन गर्न लागिएको दासले जानकारी दिए । लक्षित समूहका कुनै पनि नागरिक खोपबाट वञ्चित नहुन् भन्ने उद्देश्यले स्थानीय तह र स्वास्थ्य संस्थासँग आवश्यक समन्वय गरिएको उनको भनाइ छ ।
स्वास्थ्य कार्यालयका अनुसार अभियानका लागि पाँच लाख ७० हजार डोज खोप प्राप्त भएको छ । जिल्लाका १३१ वडामा ९०० खोप केन्द्र स्थापना गरी खोप सेवा सञ्चालन गरिनेछ ।
अभियानमा करिब ५०० स्वास्थ्यकर्मी, ६११ महिला स्वास्थ्य स्वयंसेविका र तीन हजारभन्दा बढी स्वयंसेवक परिचालन हुनेछन् । देशभर झापामा जेई सङ्क्रमणको जोखिम उच्च रहेकाले यहाँबाट अभियान सञ्चालन गर्न लागिएको कार्यालयले जनाएको छ ।
झापामा हालसम्म १३ जनामा जेई सङ्क्रमण पुष्टि भएकामा सात जनाको मृत्यु भएको छ । सङ्क्रमितमध्ये ५० वर्षमाथिका छ जना र आठ वर्षीय एक बालक रहेका छन् । मृत्यु भएका कसैले पनि जेईविरुद्धको खोप नलगाएको पाइएको प्रमुख दासले बताए ।
उनका अनुसार जेईविरुद्धको खोप सुरक्षित रहेकाले खोप लगाएपछि सामान्य असर देखिए पनि गम्भीर स्वास्थ्य समस्या नहुने बताए । उनले गर्भवती तथा तत्काल खोप लगाउन नमिल्ने अवस्थाका बिरामीबाहेक लक्षित समूहका सबै नागरिकलाई अभियानमा सहभागी भई खोप लगाउन आग्रह गरेका छन् ।
