काठमाडौं । दुई गोलको अग्रता जोगाउन नसक्दा म्यानचेस्टर युनाइटेड इंग्लिस फुटबल लिग (ईएफएल) कपको तेस्रो चरणबाटै बाहिरिएको छ ।
ओल्ड ट्राफोर्डमा भएको खेलमा युनाइटेड ब्राइटनसँग ३–२ गोलले पराजित भएको हो । खेलमा सुरुवाती दुई गोल गर्दै अग्रता लिए पनि युनाइटेडले त्यसलाई कायम राख्न सकेन ।
खेलको आठौँ मिनेटमा शिया लेसीले सिनियर टोलीका लागि आफ्नो पहिलो सुरुवाती खेलमै गोल गर्दै युनाइटेडलाई अग्रता दिलाए । त्यसको दुई मिनेटपछि मेसन माउन्टले गोल थपेपछि घरेलु टोली २–० ले अघि बढेको थियो ।
तर पहिलो हाफको इन्जुरी समयमा चारालाम्पोस कोस्टुलासले गोल गर्दै ब्राइटनलाई खेलमा फर्काए । दोस्रो हाफको ६५औँ मिनेटमा कप्तान पास्कल ग्रोसले बराबरी गोल गरे ।
त्यसको चार मिनेटपछि कोस्टुलासको पासमा म्याक्सिम डे कुइपरले गोल गर्दै ब्राइटनलाई ३–२ को अग्रता दिलाए । त्यसपछि युनाइटेडका मुख्य प्रशिक्षक माइकल क्यारिकले ७२औँ मिनेटमा ब्रुनो फर्नान्डेसलाई मैदानमा प्रवेश गराए पनि टोलीले खेलमा फर्किन सकेन ।
यो हारसँगै युनाइटेड घरेलु कपमा लगातार तेस्रोपटक ब्राइटनसँग पराजित भएको छ । यस्तै, ओल्ड ट्राफोर्डमा दुई गोलको अग्रता लिएर पराजित भएको युनाइटेडको यो सन् १९७६ यताकै पहिलो घटना हो ।
गएराति भएका अन्य खेलमा फ्लिटवुडले शेफिल्ड युनाइटेडलाई १–०, एस्टन भिल्लाले कोभेन्ट्रीलाई ३–१ तथा एभर्टनले वुल्भ्सलाई १–० ले पराजित गरेका छन् ।
