बागमती प्रदेशका सभामुख भुवनकुमार पाठकले राजीनामा दिएका छन् । उनी राष्ट्रिय प्रजातन्त्र पार्टीबाट समानुपातिक प्रदेशसभा सदस्य हुन् । जेनजी आन्दोलन चर्किँदै जाँदा उनले भदौ २४ गते नै सामाजिक सञ्जालबाट राजीनामा घोषणा गरेका थिए ।
आज उपसभामुख अप्सरा चापागाईँलाई सम्बोधन गर्दै पाठकले लिखित पत्र ह्वाट्सएपबाट पठाएर राजीनामा दिएका छन् । उनले गत भाद्र २३ गते जेन जी को भ्रष्टाचारको विरुद्ध र सुशासनको पक्षमा भएको प्रदर्शनको क्रममा अस्वाभाविक बल प्रयोगबाट राष्ट्रवादी नेपालीहरूले अनाहकमा सहादत प्राप्त गरे पछि म अत्यन्त भावविव्हल भएर पदमा बसिरहन अनुपयुक्त लागेर राजीनामा दिएको बताए ।
उनले राष्ट्र रोएको बेला नेपाली जनताको चाहना र युवा पुस्ताको भावना विपरीत पदमा बसिरहनु सर्वथा अनुचित हुन्छ भन्ने अन्तर आत्ममा लाग्यो र भाद्र २४ गते नै सामाजिक सञ्जालबाट राजीनामा गर्ने घोषणा गरेको उल्लेख गरेका छन् ।
उनले प्राविधिक कारणले कानुनी प्रकृया पुरा गर्न सो बेला अनुकूल नभएकाले नेपालको संविधान र प्रदेश सभा नियमावली २०७४ बमोजिम बागमती प्रदेश सभाको सभामुख पदवाट राजीनामा गरेको उपसभमुखलाई पठाएको पत्रमा उल्लेख छ । प्रदेश प्रमुख, मुख्यमन्त्री र बागमती प्रदेशसभा सचिवालयमा पत्रको बोधार्थ दिइएको छ ।
