नागरिक आन्दोलनका अगुवाहरुले राष्ट्रपति रामचन्द्र पौडेलको संक्रमणकालीन समयमा राष्ट्रपतिले देखाएको अभिभावकीय भूमिकाको प्रशंसा गर्दै लोकतन्त्रको जग हल्लिन नदिन भनेका छन् । विभिन्न क्षेत्रका १४ जना प्रबुद्ध नागरिकले राष्ट्रपति भवन शीतल निवासमा राष्ट्रपति पौडेललाई भेटेर सरकार निर्वाचन गराउने दायित्वबाट विमुख हुने खतरातर्फ सचेत गराएका थिए ।
उनीहरूले दलहरूका विरुद्ध प्रतिशोध साँध्ने,उनीहरूको भूमिका खुम्च्याउन खोज्ने र संवैधानिक संरचनाहरूलाई असंवैधानिक ढंगले चलाउने वा खुम्च्याउने कार्य भएमा अर्को द्वन्द्व हुनसक्ने जानकारी गराएका थिए । नागरिक अगुवाहरूले राष्ट्रपति पौडेललाई सरकारले अहिले निर्वाचनमा विदेशमा रहेका नेपालीहरुलाई पनि भाग लिन पाउनेगरी अध्यादेशमार्फत कानून संशोधन गर्न लागेको भन्दै उनीहरुले त्यसो गर्दा चुनाव समयमा नहुनेतर्फ सजग हुनुपर्ने बताएका थिए ।
जेनजी आन्दोलनमा भएको सरकारी दमन,अपराधिक घुसपैठ र भयावह हिंसात्मक घटनाको छानविनको माग गर्दै सुरक्षा निकायको सक्रियता नदेखिएको घटनाप्रति आशंका समेत जाहेर गरेका छन् ।
