नेपाली कांग्रेसका नेता डा शेखर कोइरालाले देशको संविधान क्षतविक्षत हुनबाट राष्ट्रपति रामचन्द्र पौडेलले जोगाएको बताएका छन् । शनिबार विराटनगरमा सञ्चारकर्मीसँग कुराकानी गर्ने क्रममा कोइरालाले संविधानलाई धेरै नचलाइ न्युनतम क्षति गरेर चुनावको घोषणा गरिएको बताए ।
उनले फागुन २१ गते चुनाव हुन्छ भन्ने अपेक्षा आफूहरूले लिएको स्पष्ट पारे । साथै, संविधानको धारा ६१ को उपधारा ४ लाई टेकेर राष्ट्रपतिले निर्वाचन घोषणा गरेको र त्यसले संविधान डिरेल हुनबाट जोगिएको पनि कोइरालाको भनाई थियो ।
उनले भने–‘सरकारले यो संविधानमा भएको प्रावधानलाई टेकेर ६ महिनाभित्र चुनाव गर्ने भनेको छ । अहिले संविधान डिरेल भएको छ, तर यसलाई ट्रयागमा ल्याउने भनेको निर्वाचनबाटै हो ।’
