नेपाली कांग्रेसका प्रवक्ता डा. प्रकाशशरण महतले महामन्त्रीद्वय गगन थापा र विश्वप्रकाश शर्माका पछिल्ला गतिविधिप्रति आक्रोश व्यक्त गरेका छन् । महामन्त्रीद्धयले अहिले पार्टीको नेतृत्व परिवर्तनका लागि विशेष महाधिवेशनको माग गरिरहेका छन् ।
यहीमेसोमा डा. महतले पत्रकार सम्मेलन गर्दै जिम्मेवार नेताहरू सभापति शेरबहादुर देउवामाथि आक्रमण भएको उपचार पूर्ण नभएको अवस्थामा पनि संवेदनशील हुन नसक्नु दुखको कुरा भएको बताए ।
उनले भने–‘आलो घाउ ठिक नहुँदै सुरु भएको बहसप्रति गम्भीर छौँ । अहिले एक हुने बेला हो । एक भएर कमी कमजोरी पनि हटाउने सकिँदैन र जुन बेलामा घाउ लागेको छ, घाउमा नुन छर्ने प्रवृत्ति गलत हो ।’
महतले २३ गतेभन्दा चारदिन अघिसम्म सभापति देउवाका नजिक रहेको र अहिले विसम परिस्थितीमा अहिले विरोध गरिरहेको धारणा राखे ।
उनले भने –‘२३ गतेको चारदिन अघिसम्म त्यही सभापति अत्यन्त ठिक हुने । हामी त बरु अलि टाढा लागौँला । जुन साथीहरुले अहिले प्रश्न उठाउनुभएको छ । नेतृत्व परिवर्तनको कुरा गर्नुभएको छ । उहाँहरु सबैभन्दा नजिक हुनुहुन्थ्यो । नयाँ परिस्थिति बन्नेबित्तिकै अब एकछिन पनि हुँदैन भनेको के हो ?’
