नेपाली कांग्रेस सुदूरपश्चिम प्रदेश प्रतिनिधी सभाको पुनःस्थापना र विशेष महाधिवेशनको विपक्षमा उभिएको छ । नेपाली कांग्रेस सुदूरपश्चिम प्रदेश समितिले प्रतिनिधिसभा पुनःस्थापना गर्न माग गरेको छ। बुधबार प्रदेशस्तरीय नेताहरूको बैठकले प्रतिनिधिसभा पुनःस्थापना गरेर संविधान संशोधन गर्नुपर्ने माग गरेको हो।
सुदुरपश्चिम प्रदेश समितिले जारी गरेको विज्ञप्तीमा–‘राष्ट्रिय राजनीतिको निकास दिनका लागि संविधानभित्रैबाट राजनीतिक दल, सरकार र जेनजी युवाहरूबीच राष्ट्रिय सहमति गर्नुपर्छ। त्यसका लागि प्रतिनिधिसभा पुनःस्थापना गर्ने र पुनःस्थापित प्रतिनिधिसभामार्फत संविधान संशोधन गरेर आमनिर्वाचनमा जानुपर्छ ।’
सुदूरपश्चिम कांग्रेसले यस प्रक्रियामा जेनजी युवाहरूलाई समेत सहभागी गराउनुपर्ने बताएको छ।कांग्रेसका सुदूरपश्चिमका नेताहरु विशेष महाधिवेशनको विपक्षमा उभिएका छन् । विशेष महाधिवेशनको माग राख्दै पार्टीभित्र हस्ताक्षर अभियान सुरु भएसँगै त्यसको विरुद्धमा सुदूरपश्चिमका नेताहरू देखिएका हुन् ।
बुधबार सुदूरपश्चिमका २४ नेताले हस्ताक्षर गरेर प्रतिनिधी सभा पुनःस्थापनाको पक्षमा र विशेष महाधिवेशनका लागि भइरहेको हस्ताक्षरको विपक्षमा उभिएका हुन् । हस्ताक्षर गर्नेमा कांग्रेस सुदूरपश्चिम प्रदेशका कार्यवाहक सभापति लोकराज अवस्थी, केन्द्रीय सदस्य सुशीला मिश्र, नृप वड, मुख्यमन्त्री कमलबहादुर शाह, राष्ट्रियसभा सदस्य नारायण दत्त मिश्र, कैलाली सभापति नारायण दत्त भट्ट, कञ्चनपुर सभापति पदम बोगटीलगायत सहभागी थिए।
