गृहमन्त्रालयले बाढि पहिरोेको कारण देखाउँदै आइतबार र सोमबारका लागि दिएको सार्वजानिक विदा मध्ये जिल्ला प्रशासन कार्यालय काठमाडौँले सोमबारको बिदा खारेज गरेको छ । काठमाडौं प्रशासनले सोमबार सबै सरकारी कार्यालय, संस्थान र स्थानीय तहहरू सञ्चालन गर्न निर्देशन दिएको छ । मौसममा सुधार आएपछि प्रशासनले सोमबार बिहान १० बजेबाट कार्यालय खुला हुने जनाएको छ।
काठमाडौं जिल्ला प्रशासनले आइतबार राति जारी गरेको सूचनामा भनिएको छ, ‘मौसममा सुधार भएको र जोखिमको अवस्था टरीसकेको हुँदा मिति २०८२–०६ – २० गते सोमबारका दिन बिहान १० बजे देखि कार्यालय समयसम्म काठमाडौँ जिल्लाका सबै प्रकारका सरकारी कार्यालयहरू, संस्थानहरू र स्थानीय तहहरूबाट सेवा प्रवाह हुने गरी कार्यालय खुला राख्न तथा तदनुरूप कर्मचारीहरूको उपस्थितिको व्यवस्था मिलाउन अनुरोध छ।’
गृह मन्त्रालयले आइतबार नै विपद् जोखिम र प्रतिकार्य कार्यमा प्रत्यक्ष रूपमा संलग्न नरहेका जिल्लाहरुलाई सार्वजनिक सेवा नियमित रूपमा सञ्चालन गर्न निर्देशन दिएसँगै यो नयाँ निर्णय भएको हो । यससँगै काठमाडौँका सरकारी कार्यालयहरू भोलिदेखि नियमित रूपमा सञ्चालन हुने भएका छन्।
