भदौ २३ र २४ गतेको प्रर्दशनपछि उत्पन्न विषम परिस्थितिमा नेपाली कांग्रेसको केन्द्रीय समितिको बैठक मंगलबारबाट सुरु हुँदै छ । कांग्रेसको केन्द्रीय कार्यसमिति बैठक विगतको जस्तो एक साधारण बैठक होइन । यो पार्टीको भविष्य निर्धारण गर्ने निर्णायक बैठक हुने धेरैले अनुमान गरेका छन् । यो बैठकले नियमित महाधिवेशनको मिति घोषणा गर्ने वा विशेष महाधिवेशनको घोषणा गर्ने वा केन्द्रीय कार्यसमिति भंग गरी विशेष महाधिवेशन आयोजक समिति गठन गर्ने निर्णय गर्नेछ । यो केन्द्रीय समितिको बैठकले पार्टीको आन्तरिक विषयका बारेमा निर्णय लिनुका अतिरिक्त मुलुकको विषम परिस्थितिका बारेमा पनि एउटा निचोडमा पुग्नुपर्ने छ ।
भदौ २३ र २४ गतेको प्रर्दशनपछि उत्पन्न विषम परिस्थितिपछि प्रतिनिधिसभा विघटन गरिएको छ । फागुन २१ गते चुनाव गर्ने गरी सुशीला कार्कीको नेतृत्वमा अन्तरिम सरकार गठन भएको छ । यही पेरीफेरीमा नेकपा एमालेले प्रतिनिधिसभाको पुनःस्थापनाका लागि कानूनी र आन्दोलन समेत गर्ने निर्णय गरिसकेको छ । तर कांग्रेसले यतिबेलासम्म यो विषयमा कुनै निर्णय गरेको छैन् ।
नेपाली कांग्रेस विगतमा सधैँ प्रतिनिधिसभा पुनःस्थापनाको पक्षमा रहेको छ । २०५१ सालमा तत्कालीन प्रधानमन्त्री गिरिजाप्रसाद कोइरालाले प्रतिनिधिसभा विघटन गर्दा समेत कांग्रेस प्रतिनिधिसभा पुनःस्थापनाको पक्षमा थियो । त्यो बेला सभापति कृष्णप्रसाद भट्टराई, सर्वोच्च नेता गणेशमान सिंह प्रतिनिधिसभा पुनःस्थापनाको पक्षमा थिए । यद्यपी २०५१ सालमा मध्यावधि निर्वाचन भयो ।
२०५२ सालमा तत्कालीन प्रधानमन्त्री मनमोहन अधिकारीले विघटन गर्दादेखि २०५८ सालमा तत्कालीन प्रधानमन्त्री शेरबहादुर देउवाले प्रतिनिधिसभा विघटन गर्दा पनि कांग्रेस प्रतिनिधिसभा पुनःस्थापनाको पक्षमा उभिएको थियो । २०५२ सालको प्रतिनिधिसभा विघटनलाई अदालतले पुनःस्थापना गरेको थियो । त
र २०५८ सालमा प्रतिनिधिसभा विघटन भएर घोषित मितिमा चुनाव हुन नसकेपछि राजा ज्ञानेन्द्रले शासन हातमा लिएपछि भएको आन्दोलनले २०६३ सालमा पुनःस्थापना भयो । त्यसैगरी २०७७ पुस ५ मा तत्कालीन केपी ओली नेतृत्वको झन्डै दुई तिहाइको सरकारले संसद् विघटन गरी मध्यावधि निर्वाचन घोषणा गरेका थिए । सो बेलामा पनि कांग्रेस प्रतिनिधिसभा पुनःस्थापनाको पक्षमा उभिएको थियो । पछि सो प्रतिनिधिसभालाई अदालतले पुनःस्थापना गरिदिएको थियो ।
यो पटक निर्वाचित सरकारले पनि नभई अन्तरिम सरकारका प्रधानमन्त्रीको सिफारिसमा प्रतिनिधिसभा विघटन भएको छ । नेकपा एमालेले प्रतिनिधिसभा पुनःस्थापनाको पक्षमा निर्णय गरिसकेको अवस्थामा नेपाली कांग्रेस के निर्णय गर्छ भन्ने सबैको चासो भनेको छ ।
