काठमाडौंको तारकेश्वर नगरपालिका–५ गोलढुंगा फुलबारीगेट नजिक बुधबार बेलुका खुकुरी देखाएर लुटपाट भएको छ । लुटपाटमा संलग्नहरुलाई प्रहरीले तत्कालै पक्राउ गरेको छ । प्रहरीले खबर पाएलगत्तै अस्थाई प्रहरी पोष्ट तिनपिप्लेबाट चेकिँङमा खटिएका बरिष्ठ हवल्दार जीवन बुढाथोकीको टोलीले उनीहरुलाई तत्कालै पक्राउ गरेको हो ।
गोकर्णेश्वर नगरपालिका ५ घर भएका १९ वर्षीय श्रवण तामाङ सडक किनारामा बा. प्र. ०२–०५० प १६०२ नम्बरको मोटरसाइकल रोकी बसेको अवस्थामा राति १० बजेर ५० मिनेटको समयमा बा ४२ प ४०६९ नम्बरको पल्सर मोटरसाइकलमा रहेका व्यक्तिले खुकुरी देखाएर धम्काई उनको ब्याग लुटेका थिए।
पक्राउ पर्नेहरुमा मकवानपुर भिमफेडी गाउँपालिका वडा नम्बर ५ घर भई हाल काठमाडौं जिल्ला बुढानिलकण्ठ बस्ने बर्ष २६ को सुर्य बहादुर घलान र सिन्धुलि दुधौली नगरपालिका वडा नम्बर १० घर भई हाल काठमाडौं जिल्ला बुढानिलकण्ठ बस्ने बर्ष २३ को मनोज चौधरी रहेका छन् ।
उनीहरुबाट लुटिएको झोला र लुट्न प्रयोग गरिएको खुकुरी समेत बरामद गरिएको प्रहरी वृत्त बालाजुले जनाएको छ। ट्रामाडोल नामक लागुऔषध समेत उनीहरुसँग भेटिएको छ ।
