कांग्रेस केन्द्रीय कार्यसमिति बैठक आजदेखि पुनः बस्दैछ। बैठक पार्टी केन्द्रीय कार्यालय सानेपामा आज दिउँसो १ बजे केन्द्रीय समिति बैठक सुरू हुने तय भएको छ। केन्द्रीय समितिको बैठक अगाडि कार्यवाहक सभापति पूर्णबहादुर खड्काले पार्टीका दुई महामन्त्रसहित शीर्ष नेताहरुको बैठक बोलाएका छन् ।
केन्द्रीय कार्यसमिति बैठक बस्नुअघि कार्यवाहक सभापति खड्काले सहमति खोज्न महामन्त्रीद्वय गगन थापा र विश्वप्रकाश शर्मासहित शीर्ष नेताको बैठक बोलाएका हुन् । सो बैठक बिहान ९ बजेदेखि ललितपुरस्थित धोबीघाटमा बसिरहेको छ । १५औं महाधिवेशनको मितिबारे विवाद भएपछि गत शुक्रबारका लागि तय भएको बैठक स्थगित भएको थियो ।
शनिबार सानेपामा पदाधिकारी बैठक बसेर सहमतिको प्रयास गरे पनि असफल भएको थियो । बैठकमा महामन्त्री र संस्थापन पक्षले फरक-फरक कार्यतालिका प्रस्ताव गरेका थिए । महामन्त्री विश्वप्रकाश शर्माले महासमिति सदस्यबाट महाधिवेशन चुनावअघि कि पछि भनेर भोटिङ गर्नु पर्ने प्रस्तावसमेत गरेका थिए । महाधिवेशन कार्यतालिकाबारे विवाद भएपछि शुक्रबार बस्दै नबसी बैठक स्थगित भएको थियो।
शुक्रबार बैठक स्थगित गरी आइतबारदेखि पुनः बस्ने गरी सूचना जारी गरिएको थियो। महाधिवेशन कार्यतालिकालाई लिएर सहमति जुटाउनका लागि शनिबार कार्यवाहक सभापति पूर्णबहादुर खड्काले पदाधिकारी बैठक राखेका थिए। पदाधिकारी बैठकले पनि महाधिवेशनबारे सहमति जुटाउन भने सकेन।
