राजदूत फिर्ता सम्बन्धि निर्णय कार्यान्वयनन गर्न सर्वोच्च अदालतले अन्तरिम आदेश दिएपनि सरकारले एघार मुलुकका राजदूतहरूलाई नेपाल फर्कन निर्देशन दिएको छ । परराष्ट्र मन्त्रालयले सोमबार साँझ ती सबै राजदूतहरुलाई पत्र पठाउँदै अर्काे व्यवस्था नभएसम्म मन्त्रालयमै रही कामकाज गर्नेगरी नेपाल फर्कन निर्देशन दिएको हो ।
यसरी फिर्ता गरिएका राजदूतहरूमा चीन, जर्मनी, इजरायल, मलेसिया, कतार, रसिया, साउदी अरब, स्पेन, संयुक्त अधिराज्य, जापान र संयुक्त राज्य अमेरिकास्थित नेपाली राजदूत छन् ।
नेपाल फर्कनका लागि राजदूतहरुलाई यसअघि जारी भएको हवाई टिकट नै प्रयोग गर्न र यही कार्तिक २० गतेभित्र मन्त्रालयमा आइपुग्न प्रधानमन्त्री तथा परराष्ट्र मन्त्रीस्तरीय निर्णय भएको पत्रमा उल्लेख छ । पत्रमा राजदूतहरू नेपाल फर्केपछि सम्बन्धित नियोगमा उपनियोग प्रमुखले कार्यवाहक राजदूत भई कामकाज गर्न पनि भनिएको छ ।
सर्वाेच्च अदालतको संयुक्त इजलासले आइतबारमात्र राजदूतहरू फिर्ता बोलाउने निर्णय कार्यान्वयन नगर्न अन्तरिम आदेश जारी गरेको थियो। उक्त आदेशको विषयमा सोमबार मन्त्रिपरिषदमा छलफल हुँदा अन्तरिम आदेश बमोजिम थमौतीको पत्र नपठाउने अनौपचारिक निर्णय गरिएको थियो ।
