फागुन २१ को निर्वाचन घोषणा यता देशभर मतदाताको संख्या करीब साढे आठ लाखले बढेको छ । निर्वाचन आयोगका अनुसार पछिल्लो मतदाता नामावली संकलन सुरु अघि एक करोड ८१ लाख ६८ हजार मतदाता रहेकामा चुनाव घोषणापछि आठ लाख ३७ हजार ९४ जना मतदाता थपिएका हुन् । योसँगै देशभर मतदाताको संख्या एक करोड ९० लाख ५ हजार तीन सय २४ पुगेको छ ।
चुनाव घोषणा गरेपछि मतदाता नामावली दर्ता रोक्ने व्यवस्था छ । तर जेनजी प्रर्दशनको जगमा बनेको सुशीला कार्की नेतृत्वको अन्तरिम सरकारले अध्यादेश मार्फत कानुन परिवर्तन गरेर नामावली संकलन गरेको हो । यसपटक राष्ट्रिय परिचयपत्र प्रयोग गरेर निबेदन दिँदा बायोमेट्रिकका लागि कार्यालयमा जान नपर्ने व्यवस्था पनि गरिएको थियो । जसका कारण पनि नयाँ मतदाता सङ्ख्यामा उल्लेख्य बृद्धि आएको हो ।
मतदाता नामावली दर्ताका लागि भौतिक रुपमै कार्यालयमा गएर फोटो खिचाउनेको सङ्ख्या तीन लाख ४४ हजार ९ सय १४ जना रहेको छ भने चार लाख ९२ हजार १ सय ८० जनाले राष्ट्रिय परिचयपत्र प्रयोग गरेर आवेदन दिएका छन् । आयोगले कुल मतदातामध्ये ज्यान गएका वा उजुरी परेकाहरूको टुङ्गो लगाएर आउँदो पुस १५ गतेसम्म अन्तिम मतदाता संख्या सार्वजनिक गर्नेछ ।
मतदाता सूचीमा नाम समावेश भएकामध्ये आउँदो फागुन २० गतेसम्म १८ वर्ष पुग्ने व्यक्तिहरूले मात्रै फागुन २१ गतेका लागि तोकिएको चुनावमा मतदान गर्न पाउने छन् ।
