आसन्न ११ औँ महाधिवेशनको प्रतिनिधि छनोटका लागि नेकपा एमालेले पाँच बुँदे निर्देशन जारी गरेको छ । पार्टीको संगठन विभागले हिजो साँझ भर्चुअल बैठकमार्फत पाँच बुँदे निर्णय गर्दै निर्देशन जारी गरेको हो ।
निर्देशन अनुसार प्रतिनिधि छनोटका लागि निर्वाचन प्रक्रियामा प्रवेश गर्नुभन्दा पहिला सम्बन्धित निर्वाचन क्षेत्रको अन्तिम मतदाता सूचि अनिवार्यरुपमा प्रकाशन गर्नुपर्नेछ ।
यसैगरी कायम भएको अन्तिम मतदाता सूचिको संख्या केन्द्रीय संगठन विभागलाई तत्काल जानकारी गराउनुपर्ने निर्देशनमा उल्लेख गरिएको छ । यही मंसीर १२ गते साँझसम्म सर्वसम्मतिका लागि अन्तिम प्रयास गर्ने र त्यो हुन नसकेमा १३ गते निर्वाचन प्रक्रियामा गएर प्रतिनिधि छनौट गर्न पनि निर्देशन दिईएको छ ।
निर्देशनअनुसार कुनै पनि बहानामा १३ गते गर्नु पर्ने प्रतिनिधि छनोटको कार्यक्रमलाई सार्न पाइने छैन । त्यस्तै प्रतिनिधिमा उम्मेद्वारी शुल्क बढीमा १ हजार रुपैयाँ भन्दा बढी नलिन पनि निर्देशन गरिएको छ ।
प्रतिनिधि छनौटका लागि सम्बन्धित क्षेत्रमा खटिएका नेताहरूलाई समयमै आफ्नो कार्यक्षेत्रमा पुग्न र प्रतिनिधि छनोट प्रक्रियामा सहजिकरण गर्न पनि भनिएको छ । मंसिर २७ देखि २९ गते काठमाडौँमा हुने एमालेको ११ औँ महाधिवेशनका लागि करिब २२ सय प्रतिनिधि सहभागी हुनेछन् ।
