राजधानीमा जारी नेपाल प्रिमियर लिग (एनपिएल) अन्तरगत आज पनि दुई खेल हुँदैछन् । त्रिभुवन विश्वविद्यालय क्रिकेट मैदानमा हुने दिनको पहिलो खेलमा चितवन राईनोज र काठमाडौं गुर्खाज तथा दोस्रो खेलमा कर्णाली याक्स र विराटनगर किंग्स आमने सामने हुँदैछन् ।

अंकतालिकामा ४ अंकका साथ तेस्रो स्थानको चितवन र मात्रै २ अंक रहेको काठमाडौं दुवैलाई जित्नैपर्ने दबाब छ । त्यस्तै तीन खेलबाट जम्मा दुई अंक जोडेको कर्णालीका लागि पनि प्ले अफको यात्रा काय राख्नका लागि आज जित्नै पर्ने हुन्छ । अंकतालिकाको दोस्रो स्थानमा रहेको विराटनगलाई भने कर्णालीमाथिको जितले प्ले अफ यात्रा झन सहज बनाउनेछ ।
हिजो सम्पन्न खेलमा सुदूरपश्चिम रोयल्सले लगातार चौथो जित निकालेको छ । काठमाडौँको कीर्तिपरस्थित त्रिवि क्रिकेट मैदानमा आज भएको खेलमा लुम्बिनी लायन्सलाई ७ विकेटले हराउँदै सुदूरपश्चिमले अपराजित यात्रा कायम राखेको हो ।

लुम्बिनीले दिएको १४४ रनको लक्ष्य पछ्याएको सुदूरपश्चिमले १८ ओभर २ बलमा ३ विकेट गुमाएर पूरा ग¥यो । यसअघि टस हारेर पहिले ब्याटिङको निम्तो पाएको लुम्बिनीले १९ ओभर ४ बलमा अल आउट हुँदै १ सय ४३ रन बनाएको थियो । यो जितसँगै सुदूरपश्चिम ४ खेलबाट ८ अंकका साथ शीर्षस्थानमा रहँदै प्ले अफको नजिक पुगेको छ । पराजित भएको लुम्बिनीको समान खेलबाट २ अंक छ ।
यस्तै, हिजोकै दोस्रो खेलमा जनकपुर बोल्ट्सलाई २५ रनले हराउँदै पोखरा एभेन्जर्सले पहिलो जित दर्ता गरेको छ । पोखराले दिएको १५६ रनको लक्ष्य पछ्याएको जनकपुर निर्धारित २० ओभरमा ९ विकेट गुमाएर १३० रनमा समेटियो । यसअघि टस जितेर पहिले ब्याटिङ गरेको पोखरालेले निर्धारित २० ओभरमा ६ विकेटको क्षतिमा १५५ रन बनाएको थियो ।
यो जितसँगै तीन खेलबाट पहिलो जित निकालेको पोखराको २ अंक भएको छ । लगातार तीनवटै खेल हारेको जनकपुर अंकविहीन छ ।