मंसीर २७ गतेदेखि २९ सम्म हुने नेकपा एमालेको ११ औं राष्ट्रिय महाधिवेशनका लागि आज एकैदिन देशभर प्रतिनिधि चयन हुँदैछ । सर्वसममत रुपमा महाधिवेसन प्रतिनिधी चयनको प्रयास गरिरहेको एमालेमा निर्वाचनकै माध्यमबाट भएपनि आज प्रतिनिधी टुङग्याउने तयारी भएको हो ।
सहमति नजुटेका क्षेत्रहरूमा आज बिहान ८ बजे देखि निर्वाचन सुरु भएको छ । अधिकांश क्षेत्रमा निर्वाचनको समय दिउँसो २ बजेसम्म राखिएको छ । विभिन्न जिल्लाहरूले अनुकूलता अनुसार मतदानको समय तय गरेको एमालेले जनाएको छ ।
यसअघि पार्टीको संगठन विभागले आजसम्म प्रतिनिधी चयनका लागि समयसीमासहितको पाँच बुँदे निर्देशन दिएको थियो । विभागले कुनै पनि बहानामा प्रतिनिधि छनौटलाई आजबाट पछाडि नसार्न निर्देशन दिदै १५ गतेभित्र सबै विवरण पठाउन परिपत्र जारी गरेको हो । कतिपय ठाउँमा सर्वसम्मत प्रतिनिधि छनोट भएको एमालेले जनाएको छ ।
प्रतिनिधिको उम्मेदवारी शुल्क १ हजार रुपैंयाभन्दा बढी नलिन पनि विभागले निर्देशन दिएको छ। एमालेका संगठित सदस्य ६ लाख ६७ हजार ६३० रहेका छन्। एमालेले पार्टी सदस्यको संख्याअनुसार ‘क्लस्टर’ छुट्याएर प्रतिनिधि चयनको मापदण्ड बनाइएको छ।
महाधिवेशनमा प्रतिनिधित्व गर्ने सबैभन्दा ठूलो क्लस्टर भुगोललाई एमालेले संघीय निर्वाचन क्षेत्रका आधारमा विभाजन गरेको छ । एमालेको कुल संगठित सदस्य संख्यामध्ये प्रदेशबाट ४५, प्रतिनिधि सभाको निर्वाचन क्षेत्रबाट करिब ९७०, विशेष जिल्लाबाट ४७, दलितबाट ८१, ट्रेड युनियनबाट ४९, यस्तै प्रवासबाट, केन्द्रीय विभाग र कार्यालयबाट, जनसंगठनबाट सहित गरी अनुमानित १९ सयभन्दा बढी प्रतिनिधि रहनेछन्। पाँच प्रतिशत प्रतिनिधि केन्द्रीय कमिटीले मनोनयन गर्नेछ ।
