नेकपा एमालेको एघारौं राष्ट्रिय महाधिवेशनका लागि ओखलढुंगाबाट सबै प्रतिनीधि ईश्वर पोखरेल पक्षका विजयी भएका छन् । प्रतिनिधि छनौटका लागि शनिवार भएको मतदान प्रकृयाबाट १२ जना नै पोखरेल पक्षमा प्रतिनिधि चयन भएका हुन् । ओखलढुंगामा पुर्वसांसद यज्ञराज सुनुवारले एमाले अध्यक्ष केपी ओली पक्षको नेतत्व गर्दछन भने कोशी प्रदेशका पूर्वमन्त्री अम्बिरबाबु गुरुङले इश्वर पोखरेल पक्षको नेतृत्व गर्दछन् ।
ओखलढुंगाबाट महाधिवेशनमा प्रतिनिधित्व गर्ने १२ जनामा खुलातर्फ अम्बिरबाबु गुरुङ, ज्ञान बहादुर खड्का, कमल प्रसाद न्यौपाने, अशोक थापा, राजीव कटवाल र केदारबाबु बस्नेत विजयी भएका छन् । यस्तै, महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ निर्वाचित भएका छन् । युवातर्फ टिकाराम धमला र दलिततर्फ ज्यानु कालिकोटे महाधिवेशन प्रतिनिधि चयन भएका छन् । महाधिवेशन प्रतिनिधि निर्वाचित सबै नेता जिल्लामा अम्बिर गुरुङ निकट हुन् ।
१२ जना प्रतिनिधि छनौट गर्नुपर्नेमा ४१ जनाले उम्मेदवारी दिएका थिए । प्रतिनिधि छनौटका लागि भएको मतदानमा १५१८ मत खसेको थियो । विजयीहरूले न्यूनतम मत १०७९ प्राप्त गरेका थिए ।
अम्बिरबाबु गुरुङले भने १३०४ मत प्राप्त गरेका थिए । ओली पक्षमा खुलेका पूर्व सांसद हर्कबोल राईले जम्मा १३२ मतमा सीमित हुनुपरेको थियो । त्यस्तै महिला तर्फको आरक्षण प्रतिनिधि बन्ने प्रयास गरेकी पूर्व सांसद सकुन्तला राजभण्डारी पनि १४९ मतमा सीमित हुनुपरेको थियो । ओलीको पक्षमा खुलेकै कारण ओखलढुंगा एमालेका नेताहरू नानीबाबु बुढाथोकी, उत्तम राई, मणीराज राईलगायतका नेताहरू पराजित भएका छन् ।
