नेपाली कांग्रेसको केन्द्रीय कार्यसमितिको बैठक आज बस्दै छ । पटक–पटक सर्दै आएको केन्द्रीय कार्यसमितिको बैठक आज बस्न लागेको हो । सभापति शेरबहादुर देउवाको समन्वय र निर्देशनमा कांग्रेसको १५औँ महाधिवेशन आगामी पुस २६ देखि २९ मा गर्ने सहमति भएसँगै बैठक बस्ने भएको हो ।
गत असोज २८ मा सुरु बैठक महाधिवेशनको मिति तय गर्न नसकेपनि पार्टीभित्रको विवादमा उत्कर्षमा पुगेको थियो । जेन जी प्रदर्शनमा भौतिक आक्रमणमा परेका सभापति देउवा सिंगापुरमा स्वास्थ्य उपचार सकेपछि कांग्रेस विवाद सल्ट्याउन सक्रिय बनेका थिए । फलस्वरुप सबै पदाधीकारी , पूर्वपदाधीकारी र पार्टीका शीर्ष नेतासँगको छलफल गर्दै विवादको निकासका लागि सफल बने ।
आज बस्ने केन्द्रीय समिति बैठकमा कार्यतालिकासम्बन्धी प्रस्ताव कार्यवाहक सभापति पूर्णबहादुर खड्काले पेस गर्नेछन् । आइतबार कार्यवाहक सभापति खड्काले महामन्त्रीद्वय गगन थापा र विश्वप्रकाश शर्मा, नेता रमेश लेखक र प्रचार विभाग प्रमुख मीन विश्वकर्मासहितको छलफलबाट पार्टी सभापतिको आग्रह बमोजिम कार्यतालिका प्रस्ताव तयार पारेका छन् ।
यसअघि महामन्त्री र सहमहामन्त्रीका अलगअलग प्रस्ताव पेस भएकाले सहमतिको प्रस्ताव कार्यवाहक सभापति खड्काले नै पेस गर्न लागेको स्रोतले जानकारी दिएको छ । कार्यवाहक सभापतिले राख्ने प्रस्ताव आजको बैठकमा छलफलका लागि नभएर निर्णयार्थ पेस हुनेछ ।
