नेपाली कांग्रेसका नेता कल्याण गुरुङले पुष २६–२८ गते नियमित १५ औ महाधिवेसनको निर्णय भईसकेपछि विशेष महाधिवेशनको पत्र नै निष्क्रिय र निस्तेज भईसकेको बताएका छन् । आज बिहानै फेसबुकमा लेख्दै नेता गुरुङले पार्टीको विधानको धारा १७(१) अनुसार सर्वसम्मत नियमित १५औं महाधिवेशनको निर्णय भईसकेको कारणले विधानको धारा १७(२) अन्तर्गत माग गरिएको विशेष महाधिवेशनको पत्रको वैधानिक र राजनीतिक सान्दर्भिकता, आवश्यकता, र औचित्य नै पुर्णरुपमा समाप्त भईसकेको तर्क गरेका हुन् ।
गुरुङले अब पनि विशेष महाधिवेशनको चर्चा गर्नेले पुषभित्र महाधिवेशन नचाहेको भन्ने बुझ्न जरुरी रहेको पनि उल्लेख गरेका छन् । उनले लेखेका छन्–‘अब पनि कसैले कुनै पनि सन्दर्भ वा प्रसंग जोडेर विशेष महाधिवेशनको चर्चा गर्छ भने उसले १५ औं महाधिवेशन पुष भित्र तोकिएको मितिमा चाहेको छैन भन्ने स्पष्ट बुझ्न जरुरी छ ।’
१५औं महाधिवेशनमा पराजित हुन्छु भन्ने डर र पुष भित्र तोकिएको मितिमा नियमित महाधिवेशन रोक्ने उद्देश्य पुरा गर्नको लागि स्वतः निष्क्रिय र निस्तेज भई सकेको विशेष महाधिवेशनको विषयमा आजै देखि पुनः चर्चा चलाईन थालेको उनको बुझाई छ । उनले थपेका छन्–‘ विशेष महाधिवेशनको चर्चा चलाउनेहरुले नियमित १५औं महाधिवेशनको प्रक्रिया शुरु हुनु भन्दा अगाडि नै आफ्नो हार स्विकार गरिसकेको कमजोरीका लक्षणहरु देखाई रहेका छन् । ’नेता गुरुङले विशेष महाधिवेशनलाई अब बेमौसमी चचाका रुपमा पनि टिप्पणी गरेका छन् ।
हिजो सम्पन्न केन्द्रिय समिति बैठकपछि सञ्चारकर्मीहरुसँग महामन्त्रीद्वय गगन थापा र विश्वप्रकाश शर्माले दिएको प्रतिक्रियाप्रति लक्षित गर्दै नेता गुरुङले विशेष महाधिवेशनको धम्कीपूर्ण भाषा प्रयोग भएको आरोप लगाएका छन् । ‘केन्द्रीय कार्य समितिको बैठक सकिएर बाहिर निस्किना साथ आत्तिएर बिशेष महाधिवेशनको धम्कीपुर्ण भाषा प्रयोग गरेर मिडियामा बोल्नु र सामाजिक संजालमा लेखाउनुको अर्थ र स्पष्ट संकेत देखिन्छ कि वहांहरु पुषमा तोकिएको नियमित १५औं महाधिवेशन प्रति ईमानदार हुनु हुन्न र पदीय मोहले ग्रस्त भएकोले वहांहरुलाई आफ्नो पद जाला भन्ने भयंकर त्रासले सताएको जस्तो देखिन्छ । ’
महाधिवेशन सफलतापुर्वक सम्पन्न गर्नै पर्ने जिम्मेवारी सबैको कांधमा आएको गुरुङको भनाई छ । “यो जिम्मेवारी र कर्तव्य हामीले पुरा गर्नै पर्छ । कम्तिमा अबको दुई महिना भाषण होईन; काम , काम र काम मात्रै गरौं ।”, गुरुङले लेखेका छन् ।
