आजदेखि साफ क्लब महिला च्याम्पियनसिप सुरु हुँदैछ । त्रिपुरेश्वरस्थित दशरथ रंगशालामा हुने प्रतियोगिताको पहिलो खेलमा आज पाकिस्तानको कराँची सिटी एफसी र भुटानको ट्रान्सपोर्ट यूनाईटेड लेडिज एफसी भिड्नेछन् । त्यस्तै दोस्रो खेलमा नेपालको एपीएफ क्लब र बंगलादेशको नसरिन स्पोर्टस् एकेडेमी आमनेसामने हुँदैछन् ।
दक्षिण एसियाली फुटबल इतिहासमै पहिलो पटक हुन लागेको यो प्रतियोगिताको उपाधी उचाल्ने विश्वासका साथ मैदानमा उत्रिने तयारीमा छ । नेपालको प्रतिनिधीत्व गर्ने एपिएफकी कप्तान अनिता बस्नेतले पहिलोपल्ट हुन लागेको साफ महिला क्लव च्याम्पियनसिपको तयारी पूरा भएको र उपाधि जित्ने विश्वास व्यक्त गरेकी छन् । हिजो आयोजित कप्तान तथा प्रशिक्षकको पत्रकार सम्मेलनमा अनिताले आफूहरु पहिलो साफ वुमेन्स क्लब च्याम्पियनससिप खेल्न उत्साहित रहेको बताएकी हुन् । टिम ट्रेनिङ राम्रोसँग गर्न नपाए पनि राम्रो नतिजा ल्याउने बस्नेतको विश्वास छ ।
एपिएफका मुख्य प्रशिक्षक जीवेश पाण्डेले पनि राम्रो नतिजा ल्याउने विश्वास व्यक्त गरे । प्रशिक्षक पाण्डेले टिम ट्रेनिङ राम्रोसँग गर्न नपाए पनि आफ्नो टोलीले सुखद् नतिजा ल्याउने विश्वास व्यक्त गरे । टिममा उपलब्ध खेलाडीहरूको सही सदुपयोग गर्ने उनको भनाई छ ।
सिंगल राउन्ड रोबिनका आधारमा हुने प्रतियोगिताको लिगमा शिर्ष दुई स्थान प्राप्त गर्ने टोलीले उपाधिका लागि खेल्ने छ । पहिलो संस्करणको विजेताले १० हजार अमेरिकी डलर र उपविजेताले पाँच हजार अमेरिकी डलर पुरस्कार पाउनेछन् । सहभागी तीन टोलीले दुई हजार अमेरिकी डलर प्राप्त गर्ने एन्फाले जनाएको छ । सबै टोली बुधवार नै नेपाल आइपुगेका छन् । प्रतियोगिता पुष ५ गतेसम्म चल्नेछ ।
