साहित्यकार भूपि शेरचनको ९० औँ जन्मजयन्ती आज विविध कार्यक्रम गरी मनाइँदैछ । विसं १९९२ पुस १० मा मुस्ताङको दुप्चेमा जन्मिएका साहित्यकार शेरचन थोरै तर कालजयी रचनाका कारण लोकप्रिय मानिन्छन् । उनको कृतिमध्ये ‘घुम्ने मेचमाथि अन्धो मान्छे’ चर्चित छ । शेरचनले गद्य कविता मात्र नभई गीत पनि लेख्नुभएको छ ।
‘यो नेपाली शिर उचाली संसारमा लम्कन्छ’ बोलको गीत उनउहाँको निकै चर्चित गीत हो । ‘हुँदैन विहान मिरमिरेमा तारा झरेर नगए, बन्दैन देश दुईचार सपुत मरेर नगए’ जस्ता लोकप्रिय कविबतालाई सरल, सहज र सबैले बुझ्ने भावको बनाउनुमा उनको ठूलो योगदान छ । प्रगतिवादी धारमा कविता लेख्ने भूपिको विसं २०४६ जेठ १ गते निधन भएको थियो ।
उनले साझा पुरस्कार, गोरखा दक्षिण बाहुपुरस्कार प्राप्त गरेका थिए । सुब्बा हितमान शेरचन र पदमकुमारी शेरचनका कान्छा छोरा भूपि शेरचनको खास नाम भूपेन्द्रमान शेरचन हो । भूपि पाँच वर्षका हुँदा उनकी आमाको मृत्यु भएकाले र उनका दिदीबैनी नभएकाले उनी मातृजातिको स्नेहबाट वञ्चित भएको उल्लेख छ । त्यति मात्र नभएर छोरीको आशमा छोरा भइदिएकोले पारिवारिक उपेक्षामा उनको बाल्यकाल बितेका थिए ।
भूपि २०३६ मा नेपाल राजकीय प्रज्ञा प्रतिष्ठानका सदस्य बनेका थिए । प्रज्ञा प्रतिष्ठानको कुर्ची पदबाट भूपि सन्तुष्ट भने देखिँदैनन् । उनी “घुम्ने मेचमाथि पुगेपछि म आधा अन्धो मान्छेचाहिँ भएँ” भनी यसप्रति असन्तुष्टि व्यक्त गर्छन् । आठ सन्तानका पिता र दुई पत्नीका पति भूपि सङ्गीत, क्रिकेटमा रूचि राख्थे ।
