वैकल्पिक राजनीतिक शक्तिको नेतृत्वका लागि भन्दै राष्ट्रिय स्वतन्त्र पार्टी र काठमाडौ महानगरपालिका मेयर बालेन शाहबीच ७ बुँदे सहमति भएको छ ।
आज बिहानै भएको सहमतिअनुसार पार्टीको सभापति रवि लामिछाने हुने र प्रतिनिधिसभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन शाह बन्ने तय भएको हो । त्यस्तै पार्टीको नाम राष्ट्रिय स्वतन्त्र पार्टी (रास्वपा) र चुनाव चिन्ह घण्टी हुने पनि सहमति गरिएको छ ।
नवयुवाहरुले भ्रुष्टाचार र कुशासन विरुद्ध गरेको आन्दोलनको अपनत्व लिई, घाईते तथा शहिद परिवारका मागहरुको यथोचित सम्वोधन गर्ने प्रतिवद्वता जनाउन पनि दुई नेता सहमत भएका छन् । आर्थिक सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने पनि सहमतिपत्रमा उल्लेख छ ।
पार्टीको सङ्गठनात्मक संरचनालाई थप सक्षम र फराकिलो बनाउन युवा अभियन्ता एवम् अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने पनि उल्लेख गरिएको छ । आसन्न आमनिर्वाचन लगत्तै यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने सहमति पनि उनीहरुबीच भएको छ ।
लामिछाने र शाहबिच एकताका लागि विगत केहीदिन देखि लगातार वार्ता भईरहेको थियो । एकतामा उज्यालो नेपाल पार्टीलाई पनि समेट्ने भनिएपनि आज भएको सहमतिमा उक्त पार्टी सँगै रहेन । उज्यालो पार्टीका संरक्षक कुलमान घिसिङले अस्तित्वको प्रश्न उठाउँदै असहमति जनाएका थिए ।
