काठमाडौँ । नेपाली कांग्रेसको विशेष महाधिवेशनबाट सभापतिमा निर्वाचित गगन थापाले पार्टी अब परिवारवाद र गुटबन्दीबाट मुक्त भएको दाबी गरेका छन्। बुधबार राति विशेष महाधिवेशनलाई सम्बोधन गर्दै उनले कांग्रेसभित्र समानता, पारदर्शिता र निर्णय प्रक्रियामा नयाँ अभ्यास सुरु भएको बताए।
उनका अनुसार कांग्रेस अब कुनै व्यक्ति वा समूहको वरिपरि घुम्ने पार्टी नरहेको स्पष्ट सन्देश महाधिवेशनले दिएको छ। “क्रियाशील सदस्यदेखि सभापतिसम्म सबै बराबर छन् भन्ने मान्यताबाट नयाँ परम्परा आरम्भ भएको छ,” उनले भने। पार्टीभित्रका प्रश्न र असमझदारीलाई समयमै समाधान नगरे बाहिर जनताको न्याय गर्न नसकिने तर्क पनि उनले अघि सारे।
थापाले पूर्व सभापति शेरबहादुर देउवाको भूमिकालाई स्मरण गर्दै नेतृत्व हस्तान्तरणको बहसलाई स्वाभाविक प्रक्रिया भएको बताए। “पार्टी र सरकार कसले नेतृत्व गर्ने भन्ने निर्णय स्पष्ट गर्न आग्रह गर्नु अपराध थिएन,” उनको भनाइ थियो। उनले पार्टीलाई सही दिशामा उभ्याउने निर्णायक कदम आवश्यक रहेको पनि जोड दिए।
विशेष महाधिवेशनपछि देखिएका अन्योल हटाउन भोलि नै केन्द्रीय बैठक बस्ने र निर्वाचन आयोगमा आवश्यक अध्यावधिक गराइने थापाले जानकारी दिए। “यससँगै कांग्रेसभित्रका द्विविधा अन्त्य हुनेछन्,” उनले भने, “यो भुइँ तहका कार्यकर्ताबाट भएको सबैभन्दा ठूलो हस्तक्षेप हो।”
विशेष महाधिवेशन पक्षधर समूहबाट सभापतिसहित १३ पदाधिकारी र १२१ केन्द्रीय सदस्य निर्वाचित भएका छन्। निर्वाचन परिणाम सार्वजनिक भएपछि विश्वप्रकाश शर्मा ले सभापति थापालाई दूबोको माला लगाएर बधाई दिएका थिए।
