तेहरा- संयुक्त राष्ट्रको मानवअधिकार कार्यालयले इरानमा भएको एक छात्रा विद्यालयमाथिको आक्रमणको छानबिन गर्न माग गरेको छ।
इजरायलले गरेको यस नरसंहारपूर्ण आक्रमणमा १५० कलिला छात्रा मारिएका थिए । तर, यस आक्रमणको जिम्मेवारी कसको हो भन्ने कुरा कार्यालयले खुलाएको छैन।
संयुक्त राष्ट्रका मानवअधिकार प्रमुख भोल्कर टुर्कले यस घटनाको छिटो, निष्पक्ष र पूर्ण छानबिन हुनु आवश्यक रहेको बताएका छन् ।जेनेभामा आयोजित प्रेस सम्मेलनमा प्रवक्ता रविना शमदासानीले भनिन्, ‘जसले आक्रमण गरेको हो, त्यसले नै छानबिन गरी सत्य बाहिर ल्याउन जिम्मेवार हुनु पर्छ।’
राष्ट्रसंघीय अधिकारीहरूले यस घटनालाई अत्यन्तै भयावह भएको बताएका छन् । सामाजिक सञ्जालमा सार्वजनिक भएका तस्वीरहरूले यस संघर्षको विनाश र पीडा देखाउने उनीहरूको तर्क छ ।
यो प्राथमिक विद्यालय दक्षिणी इरानमा रहेको छ, गत शनिबार इजरायलले यस विद्यालयमा बम खसालेको थियो । त्यही दिन अमेरिकाले र इजरायलले इरानमाथि सैन्य कारबाही सुरु गरेका थिए।
अमेरिकाका विदेशमन्त्री मार्को रुबियोले अमेरिकी सेना जानबुझेर कुनै विद्यालयलाई निशाना नबनाउने जिकिर गरे। इजरायलले यस घटनाको छानबिन भइरहेको जनाएको छ।
जेनेभामा संयुक्त राष्ट्रका लागि इरानका राजदूत अली बहरेनीले यस आक्रमणलाई गलत र ‘आपराधिक’ बताएका छन्। उनका अनुसार यस आक्रमणमा १५० छात्रा मारिएका छन्।
