काठमाडौं- टर्कीको सबैभन्दा ठूलो शहर इस्तानबुलमा रहेको इजरायली नियोगमा गोली चलेको छ । इस्तानबुलको बेसिक्टास जिल्लामा मंगलबार भएको घटनामा तीन जनाको मृत्यु भएको छ । घटनामा अरु दुई प्रहरी अधिकारी घाइते भएका छन् ।
समाचार संस्था रोयटर्सले जनाएअनुसार नियोगमा गोली चल्नेबित्तिकै प्रहरीले बन्दुक झिकेर ‘कभर’ लिएका थिए । घटनास्थलको भिडियोमा एक जना रगताम्य भएको देखिन्छ ।
सीएनएन तुर्कका अनुसार प्रहरीको गोली लागेर मारिएका तीनै जना संदिग्ध बन्दुकधारी हुन् ।
हाल घटनास्थलमा सुरक्षा व्यवस्था चुस्त पारिएको छ । सो क्षेत्रमा व्यापक सुरक्षाकर्मी परिचालन गरिएको जनाइएको छ ।
इजरायली अखबार जेरुसलेम पोस्टको अनलाइन संस्करणले जनाएअनुसार सो नियोग दुई वर्षदेखि बन्द रहेको छ ।
टर्कीका न्यायमन्त्री अकिन गुर्लेकले घटनाको अनुसन्धान हुने जनाएका छन् ।
