काठमाडौँ – नेपाली काँग्रेसभित्र संस्थापन इतर समूहको बैठक सुरु भएको छ । समूहका नेता तथा पूर्व कार्यवाहक सभापति पूर्णबहादुर खड्काको नेतृत्वमा बैठक धुम्बाराहीस्थित होटेल स्मार्टमा जारी रहेको छ ।
बैठकमा समूहका शीर्ष नेताहरू, १४ औँ महाधिवेशनमा निर्वाचित केन्द्रीय सदस्यहरू, जिल्ला सभापतिहरू तथा उपत्यकामा उपलब्ध क्षेत्रीय सभापतिहरूको उपस्थिति रहेको जनाइएको छ ।
यसअघि सोही स्थानमा वैशाख ६ गते आयोजित छलफलपछि उक्त समूहले तत्काल ठोस निर्णय नगरी ‘पर्ख र हेर’को रणनीति अपनाएको थियो ।
विशेष महाधिवेशनमार्फत गगन थापाको नेतृत्वमा पार्टी संरचना पुनर्गठन भएपछि पूर्णबहादुर खड्का उक्त प्रक्रियाप्रति असन्तुष्ट देखिँदै आएका छन् । उनले विशेष महाधिवेशन खारेजको माग गर्दै सर्वोच्च अदालतमा रिट दायर गरेका थिए ।
तर सर्वोच्च अदालतले रिट खारेज गरेसँगै गगन थापा नेतृत्वको संरचनालाई वैधानिकता प्रदान भएपछि पनि खड्काले आन्तरिक छलफल र समूहगत बैठकलाई निरन्तरता दिँदै आएका छन् ।
संस्थापन पक्षले उनका गतिविधिलाई अनुशासन विपरीत भन्दै स्पष्टीकरण मागेको भए पनि उनले त्यसको जवाफ नदिएको जनाइएको छ ।
यसैबीच, वैशाख ६ गते सभापति गगन थापा खड्का निवास पुगेको भेटवार्ता पनि भएको थियो । तर उक्त छलफलका विषयवस्तु सार्वजनिक गरिएको छैन ।
