काठमाडौँ – लियोनेल मेसी र अर्जेन्टिना लगातार विश्वकप उपाधि रक्षा गर्ने पहिलो टोली बन्ने अभियानमा छन् । फिफा विश्वकप २०२६ का लागि अर्जेन्टिना समूह ‘जे’ मा परेको छ । यस समूहमा लामो समयपछि विश्वकपमा पुनरागमन गरेका अल्जेरिया र अस्ट्रिया तथा नवप्रवेशी जोर्डन छन् । फिफाले ४८ राष्ट्रको विश्वकप गरेपछि जोर्डनले पहिलो पटक खेल्ने अवसर पाएको हो ।
अर्जेन्टिनाले विश्वकप उपाधि रक्षा गरेमा मेसी विश्वका दुई महान् फुटबलर पेले र डिएगो म्याराडोनाकै अद्भूत श्रेणीमा पुग्ने छन् । गत संस्करणमा अर्जेन्टिनाले फ्रान्सलाई पेनाल्टी सुटआउटमा हराएर उपाधि जितेको थियो । सन् १९५८ र १९६२ मा ब्राजिलले लगातार दुई पटक विश्वकप जितेयता कुनै पनि राष्ट्रले उपाधि रक्षा गर्न सकेका छैनन् ।
अर्जेन्टिना कस्तो छ ?
तीन पटकको विजेता तथा फिफा वरीयताको तेस्रो स्थानमा रहेको अर्जेन्टिनाले जुन १६ मा अल्जेरियासँग खेल्दै उपाधि रक्षा अभियानको सुरुवात गर्ने छ । त्यसपछि उसले अस्ट्रिया र जोर्डनको सामना गर्ने छ । दक्षिण अमेरिकी छनोटमा शीर्ष स्थान हासिल गरी अर्जेन्टिनाले १५ महिनाअघि नै विश्वकपमा स्थान सुरक्षित गरेको थियो । ब्राजिललाई हराउँदै अर्जेन्टिना विश्वकपमा चयन हुँदा मेसी भने चोटका कारण टोलीमा थिएनन् ।
वर्तमान कोपा अमेरिका च्याम्पियन अर्जेन्टिनाका कप्तान मेसी पोर्चुगलका क्रिस्टियानो रोनाल्डोसँगै छ वटा विश्वकप खेल्ने पहिलो खेलाडी बन्दै छन् । विश्वकपमा मेसीको नाममा सर्वाधिक २६ खेलको कीर्तिमान छ ।
अर्जेन्टिना रहेको समूह ‘जे’मा अल्जेरिया, अस्ट्रिया र जोर्डन छन् ।
