कपिलवस्तु । भारतबाट अवैध रूपमा भित्र्याइएका ४ हजार २ सय ब्रोइलर कुखुराका चल्लासहित कपिलवस्तु प्रहरीले एक जनालाई पक्राउ गरेको छ।
मायादेवी गाउँपालिका-८ घोलाहाबाट ती चल्ला बरामद गरिएको हो। सातवटा साइकलमा राखेर नेपालतर्फ ल्याउँदै गरेको अवस्थामा प्रहरीले उक्त चल्ला नियन्त्रणमा लिएको हो।
प्रहरी टोलीलाई देखेपछि ६ जना साइकल चालक फरार भएका थिए। प्रहरी नायब उपरीक्षक रिपेन्द्र कुमार सिंहका अनुसार भाग्दै गरेकामध्ये मायादेवी गाउँपालिका–१ पकडीका शिवनाथ धोबीलाई प्रहरीले नियन्त्रणमा लिएको छ।
बरामद गरिएका चल्लाको बजार मूल्य ४ लाख रुपैयाँभन्दा बढी रहेको प्रहरीले जनाएको छ।
बरामद गरिएका चल्लालाई जेसिबी प्रयोग गरी खाल्डो खनेर नष्ट गरिएको छ। पक्राउ परेका धोबीलाई आवश्यक कारबाहीका लागि पशु क्वारेन्टाइन चेक पोस्ट कृष्णनगर पठाइएको प्रहरी नायब उपरीक्षक सिंहले बताएका छन्।
नेपालको तुलनामा भारतमा कुखुराको चल्ला र मासु सस्तो पाइने भएकाले तस्करहरूले स्थानीय भरिया प्रयोग गरी अवैध रूपमा यस्ता सामग्री भित्र्याउने गरेको मासु व्यापारीहरूले दाबी गरेका छन्।
