काठमाडौँ। राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टी संगठनलाई थप सशक्त र व्यवस्थित बनाउन कार्यकर्ता तथा समर्थकहरूलाई सक्रिय भूमिका निर्वाह गर्न आग्रह गरेका छन्।
नयाँ दिल्लीमा आयोजित एक कार्यक्रममा सम्बोधन गर्दै उनले पार्टीले जनतासामु गरेका प्रतिबद्धताप्रति उत्तरदायी भएर काम गरिरहेको दाबी गरे। साथै, कुनै कमजोरी वा त्रुटि देखिए त्यसबारे रचनात्मक सुझाव र खबरदारी गर्न समर्थकहरूलाई आग्रह गरे।
लामिछानेले रास्वपालाई विश्वास गरेर समर्थन गर्ने मतदाताको अपेक्षा र भरोसालाई कायम राख्न आफूहरू प्रतिबद्ध रहेको उल्लेख गर्दै जनविश्वासमा आघात पुग्ने कुनै कार्य नगर्ने प्रतिबद्धता व्यक्त गरे।
उनले सरकारको उद्देश्य र नीतिगत दिशाप्रति अनावश्यक शंका गर्नुपर्ने अवस्था नरहेको धारणा राख्दै सरकार सुधार र परिणाममुखी कामतर्फ केन्द्रित रहेको बताए।
साथै, निर्णय प्रक्रियामा कुनै कमजोरी देखिए त्यसलाई सच्याउने अवसर दिनुपर्ने र आवश्यक परेको अवस्थामा आलोचना तथा निगरानीमार्फत मार्गदर्शन गर्नुपर्ने उनको भनाइ थियो।
लामिछानेले रास्वपाका समर्थकहरू केवल समर्थन गर्ने समूह नभई आवश्यक पर्दा पार्टीलाई सचेत गराउने र सही दिशामा अघि बढ्न सहयोग गर्ने महत्वपूर्ण शक्ति भएको बताए। पार्टीले आफ्ना सदस्य र समर्थकको आलोचना तथा सुझाव दिने अधिकारलाई सम्मान गर्ने पनि उनले स्पष्ट पारे।
