सङ्घीय संसद् प्रतिनिधि सभाको दोस्रो अधिवेशन अन्तर्गत आज बैठक बस्दैछ । संघीय संसद सचिवालयले आज बिहान ११ बजे बस्ने बैठकको मूख्य कार्यसूची सार्वजनिक गरेको छ । आजको बैठकमा आगामी आर्थिक वर्षको बजेटमाथि छलफल र विभिन्न विधेयकहरू प्रस्तुत गर्ने मुख्य कार्यसूची रहेको छ ।
बैठकमा डा. स्वर्णिम वाग्लेले वक्तव्यसहित आगामी आर्थिक वर्षको राजस्व र व्ययको वार्षिक अनुमानमाथि छलफल प्रारम्भ गरियोस भन्ने प्रस्ताव प्रस्तुत गर्ने कार्यसूची रहेको छ। छलफलका क्रममा उठेका प्रश्नहरूको जवाफ अर्थमन्त्री वाग्लेले दिने पनि तय भएको छ ।
व्यवस्थापन कार्य अन्तर्गत अर्थमन्त्री वाग्लेले विभिन्न महत्त्वपूर्ण विधेयकहरू सदनमा प्रस्तुत गर्ने कार्यक्रम छ । ‘विनियोजन विधेयक, २०८३’ लाई प्रस्तुत गर्न अनुमति माग्ने प्रस्ताव प्रस्तुत गर्नुका साथै वाग्लेले उक्त विधेयक संसद्मा प्रस्तुत गर्ने कार्यसूची रहेको छ । अर्थमन्त्रीले ‘राष्ट्र ऋण उठाउने विधेयक, २०८३’ र ‘नेपाल राष्ट्र बैङ्क (तेस्रो संशोधन) विधेयक, २०८३’ लाई संसद्मा प्रस्तुत गर्ने कार्यसूची तय भएको छ।
आजको बैठकमा राष्ट्रिय सभामा उत्पत्ति भएको ‘पर्यटन विधेयक, २०८२ लाई दफावार छलफलको लागि सम्बन्धित समितिमा पठाउने प्रस्ताव पर्यटन तथा नागरिक उड्डयन मन्त्री खड्कराज पौडेलले प्रस्ताव प्रस्तुत गर्नुहुनेछ ।
यसैगरी, युवा, श्रम तथा रोजगार मन्त्री रामजी यादवले ‘अन्तर्राष्ट्रिय श्रम संगठनको श्रम निरीक्षण सम्बन्धी महासन्धी, १९४७ नंम्बर ८१’ र ‘अन्तर्राष्ट्रिय श्रम संगठनको बाध्यकारी श्रम महासन्धी, १९३० सम्बन्धी सन् २०१४ को प्रोटोकल नम्बर. २९’ सदनमा पेस गर्ने कार्यसूची रहेको जानकारी संसद् सचिवालयले जनाएको छ ।
