पहिलो केन्द्रीय महाधिवेसनको तयारीमा रहेको राष्ट्रिय स्वतन्त्र पार्टीको आज बागमती प्रदेश अधिवेशन हुँदैछ । मकवानपुरको हेटौँडामा उद्घाटन हुने अधिवेशनमा प्रदेशका जिल्ला, पालिका तथा वडा तहबाट छनोट भएका एक हजारभन्दा बढी प्रतिनिधि सहभागी हुने रास्वपाले जनाएको छ ।
वाग्मतीका १ हजार १ सय २१ वडामध्ये करिब ९०० वडामा अधिवेशन सम्पन्न भइसकेको छ भने ११९ वटै पालिकामा पार्टीको संगठन विस्तार भएको रास्वपाले जनाएको छ । रास्वपाले अधिवेशनका लागि प्रतिनिधिहरूले जनही एक हजार ५०० पैयाँ प्रतिनिधि शुल्क बुझाउने व्यवस्था गरेको छ ।
अधिवेशनको सभापति रवि लामिछानेले उद्घाटन गर्नेछन् । अधिकांश जिल्लामा निर्वाचनमार्फत नयाँ नेतृत्व चयन गरेको रास्वपामा पहिलो प्रदेश अधिवेसनमा पनि सर्वसम्मत नेतृत्व चयन हुने सम्भावना न्यून रहेको छ ।
प्रदेशको आगामी नेतृत्वका लागि उत्सव अर्याल, वर्तमान सभापति तथा प्रतिनिधि सभा सदस्य अच्युतम लामिछाने डाक्टर रमेश ढकाललगायतले आकांक्षा राखेको बताईएको छ । रास्वपाको विधानअनुसार बागमती प्रदेश कार्यसमिति ६५ सदस्यीय हुनेछ ।
समितिमा एक–एक जना सभापति, उपसभापति र महामन्त्री रहने व्यवस्था छ भने दुई जना सहमहामन्त्री फरक–फरक लिङ्गका हुनुपर्ने प्रावधान रहेको छ। पदाधिकारीमा सभापति, उपसभापति, महामन्त्री, सहमहामन्त्री, कोषाध्यक्ष र प्रवक्ता रहनेछन्।
