काठमाडौं-श्रम संस्कृति पार्टीले प्रतिनिधिसभामा लगातार विरोध जनाएपछि सभामुख डीपी अर्यालले पार्टीका अध्यक्ष तथा प्रतिनिधिसभा सदस्य हर्क साम्पाङलाई बोल्न समय दिएका छन्।
साम्पाङले प्रतिनिधिसभा नियमावलीको व्यवस्था प्रभावकारी रूपमा कार्यान्वयन हुन नसकेको भन्दै संसदभित्रै नियम र कानुनको पालना नभएको अवस्थामा देशका लागि कानुन निर्माण हुन नसक्ने बताए।
‘सदनमा बोल्नका लागि पनि आन्दोलन गर्नुपर्ने भयो। प्रधानमन्त्रीलाई संसदमा बोलाउनका लागि पनि हामी आन्दोलन गर्दै आएका छौं,’ उनले भने, ‘हामी आफैंले नियम र कानुन मिचेर बस्ने हो भने देशका लागि कसरी कानुन बनाउने ?’
प्रधानमन्त्रीको संसदप्रतिको भूमिकामा असन्तुष्टि हुदै प्रधानमन्त्री नियमित रूपमा सदनमा उपस्थित हुनुपर्ने बताए। प्रधानमन्त्री आफैं सदनमा नआउने भन्दै उनले मन लागेको बेला मात्रै सदनमा आएर बोल्ने प्रवृत्ति ठिक नभएको बताए। उनले प्रधानमन्त्रीलाई संसदप्रति जिम्मेवार बनाउन सभामुखले रुलिङ गर्नुपर्ने बताए।
‘प्रधानमन्त्रीलाई तपाईंले रुलिङ गर्नुपर्छ, प्रधानमन्त्री पनि हामीजस्तै संसद सदस्य हुन्। प्रधानमन्त्री संसदभन्दा ठूलो होइन, संविधानभन्दा पनि ठूलो होइन।’ उनले भने
